కురాన్ భావామృతం/అల్-ముతఫ్ఫిఫీన్
| కురాన్ భావామృతం అధ్యాయములు |
|
1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 | 32 | 33 | 34 | 35 | 36 | 37 | 38 | 39 | 40 | 41 | 42 | 43 | 44 | 45 | 46 | 47 | 48 | 49 | 50 | 51 | 52 | 53 | 54 | 55 | 56 | 57 | 58 | 59 | 60 | 61 | 62 | 63 | 64 | 65 | 66 | 67 | 68 | 69 | 70 | 71 | 72 | 73 | 74 | 75 | 76 | 77 | 78 | 79 | 80 | 81 | 82 | 83 | 84 | 85 | 86 | 87 | 88 | 89 | 90 | 91 | 92 | 93 | 94 | 95 | 96 | 97 | 98 | 99 | 100 | 101 | 102 | 103 | 104 | 105 | 106 | 107 | 108 | 109 | 110 | 111 | 112 | 113 | 114 |
83. ముతప్ఫిఫీన్‌ (హస్తలాఘవం)
(అవతరణ: మక్కా; సూక్తులు: 36)
కరుణామయుడు, కృపాసాగరుడయిన దేవుని పేరుతో ప్రారంభం
తూకం తగ్గించేవారికి వినాశం తప్పదు. వారు ప్రజల నుండి (సరుకు) తీసుకునే టప్పుడు పూర్తిగా తూచి లేక కొలచి తీసుకుంటారు; ఇచ్చేటప్పుడు తగ్గించి ఇస్తారు. ఒక భయంకర దినాన తాము లేపి ప్రవేశపెట్టబడతామని వారికి తెలియదా? ఆరోజు యావత్తు మానవులు విశ్వప్రభువు ముందు (తలలు వంచి) నిలబడతారు. (1-6)
(వారు తమ దుష్కార్యాలకు జవాబుచెప్పుకోవలసిన పనిలేదని భావిస్తున్నారా?) ఎంతమాత్రం కాదు. దురాత్ముల కర్మల వివరాలు కారాగారం చిట్టాలో ఉంటాయి. కారాగారం చిట్టా అంటే ఏమిటో నీకు తెలుసా? అదొక లిఖితగ్రంథం. (7-9)
తీర్పుదినాన్ని తిరస్కరించే ధిక్కారులకు ఆరోజు వినాశం తప్పదు. హద్దులు మీరే పాపాత్ముడు తప్ప దాన్నెవరూ తిరస్కరించరు. మా సూక్తులు విన్పిస్తున్నప్పుడు “ఇవి పూర్వీకుల పుక్కిటిపురాణాలు.” అనంటాడతను. ఎంతమాత్రం కాదు. అసలు వీరి హృద యాలకు వీరిదుష్కార్యాల త్రుప్పుపట్టింది. ఎంతమాత్రం కాదు. ఆరోజు వీరు తప్పక తమ ప్రభువు దర్శనభాగ్యానికి దూరంగా ఉంచబడతారు. ఆతర్వాత నరకంలో పడతారు. అప్పుడు వారికి “మీరు తిరస్కరించినది ఇదే” అని చెప్పడం జరుగుతుంది. (10-17)
ఎంతమాత్రం కాదు. పుణ్యాత్ముల కర్మల వివరాలు మహోన్నతుల చిట్టాలో ఉంటాయి. మహోన్నతుల చిట్టా అంటే ఏమిటో నీకు తెలుసా? అదొక లిఖిత గ్రంథం. దాన్ని సన్నిహితులైన దైవదూతలు కాపాడుతున్నారు. పుణాత్ములు భోగభాగ్యాలలో ఓల లాడుతుంటారు. ఉన్నతాసనాలపై కూర్చొని (స్వర్గవైభవాలు) తిలకిస్తుంటారు.
నీకు వారి ముఖాలలో సుఖసంతోషాలతో కూడిన కళాకాంతులు గోచరిస్తాయి. వారు స్వచ్ఛమైన విశేషమధుపానం సేవిస్తారు. ఆ మధుపాత్రలకు కస్తూరి సీళ్ళుంటాయి. సౌఖ్యాల కోసం పోటీపడేవారు దీన్ని సాధించడానికి పోటీపడాలి. ఆ మధువులో తస్నీం కలసివుంటుంది. ఇదొక సెలయేరు. సన్నిహిత భక్తులు దీని పానీయంతోపాటు సారా సేవిస్తారు. (18-28)
(ఇహలోకంలో) నేరస్థులు విశ్వాసుల్ని హేళన చేస్తుండేవారు. వారి ముందు నుంచి పోతున్నప్పుడు వారివైపు చూసి ఒకర్నొకరు కనుసైగలు చేసుకునేవారు. ఇండ్లకు తిరిగొస్తూ (ఏదోఘనకార్యం వెలగబెట్టినట్లు) తెగ సంబరపడిపోతారు. వారిని చూసినప్పు డల్లా “వీరా, వీరు మతభ్రష్టులండీ!” అంటారు. కాని (దేవుడు) వీరిని వారిపై రక్షక భటు లుగా నియమించి పంపలేదు. ఆరోజు విశ్వాసులు అవిశ్వాసుల్ని చూసి నవ్వుతుంటారు. ఉన్నతాసనాలపై (హుందాగా) కూర్చొని వారి దుస్థితి చూస్తుంటారు. ఇక తిరస్కారుల సంగతి- వారికి వారి (వికృత)చేష్టలకు తగిన ప్రతిఫలం దక్కిందికదా! (29-36)