శృంగారించుకొని వెడలిరి శ్రీ కృష్ణునితోను

త్యాగరాజు కృతులు

అ • ఆ • ఇ • ఈ • ఉ • ఊ • ఋ • ౠ • ఎ • ఏ • ఐ • ఒ • ఓ • ఔ • అం • అః • క • ఖ • గ • ఘ • ఙ • చ • ఛ • జ • ఝ • ఞ • ట • ఠ • డ • ఢ • ణ • త • థ • ద • ధ • న • ప • ఫ • బ • భ • మ • య • ర • ల • వ • శ • ష • స • హ • ళ • ఱ

పల్లవి

శృంగారించుకొని వెడలిరి శ్రీ కృష్ణునితోను సంతోషముగా

అనుపల్లవి

అంగ-రంగ వైభోగముతో

గోపాంగనామణులెంతో సొగసుగ ॥ శృంగారించుకొని ॥

చరణములు

నవ్వుచు కులుకుచునొకతె కొప్పున

పువ్వుల ముడుచుచునొకతె

దువ్వుచు కురులనునొకతె కృష్ణుని

రవ్వ జేయుచునునొకతె వేడ్కగ ॥ శృంగారించుకొని ॥

మగడు వీడనుచునొకతె

రవికె బిగువున చేర్చుచునొకతె

తగును తనకనుచునొకతె పాద

యుగములనొత్తుచునొకతె వేడ్కగ ॥ శృంగారించుకొని ॥

సొక్కుచు సోలుచునొకతె కృష్ణుని

గ్రక్కున ముద్దిడునొకతె

పక్కను రమ్మను చొకతె మడుగులఁ-

అక్కర-నొసగుచు-నొకతె వేడ్కగ ॥ శృంగారించుకొని ॥

పరిమళము-లందుచు-నొకతె శ్రీ

హరి హరియనుచునునొకతె

ఉరమున జేర్చుచునొకతె పయ్యెద

జరిపి వేడుకొనుచునొకతె వేడ్కగ ॥ శృంగారించుకొని ॥

సారసాక్ష యనుచును-నొకతె కను

సైగను పిలుచుచునొకతె

రారా యనుచును-నొకతె త్యాగ-

రాజ సఖుడనుచు నొకతె వేడ్కగ ॥ శృంగారించుకొని ॥