శుక్ల యజుర్వేదము - అధ్యాయము 20
| ←ముందరి అధ్యాయము | శుక్ల యజుర్వేదము (శుక్ల యజుర్వేదము - అధ్యాయము 20) | తరువాతి అధ్యాయము→ |
క్షత్రస్య యోనిరసి క్షత్రస్య నాభిరసి |
మా త్వా హిఁసీన్మా మా హిఁసీః ||
ని షసాద ఘృతవ్రతో వరుణః పస్త్యాస్వా |
సామ్రాజ్యాయ సుక్రతుః |
మృత్యోః పాహి |
విద్యోత్పాహి ||
దేవస్య త్వా సవితుః ప్రసవే శ్వినోర్బాహుభ్యాం పూష్ణో
హస్తాభ్యామ్ |
అశ్వినోర్భైషజ్యేన తేజసే బ్రహ్మవర్చసాయాభి షిఞ్చామి |
సరస్వత్యై భైషజ్యేన వీర్యాయాన్నాద్యాయాభి షిఞ్చామి |
ఇన్ద్రస్యేన్ద్రియేణ బలాయ శ్రియై యశసే భి షిఞ్చామి ||
కో సి కతమో సి కస్మై త్వా కాయ త్వా |
సుశ్లోక సుమఙ్గల సత్యరాజన్ ||
శిరో మే శ్రీర్యశో ముఖం త్విషిః కేశాశ్చ శ్మశ్రూణి |
రాజా మే ప్రాణో అమృతఁ సమ్రాట్చక్షుర్విరాట్శ్రోత్రమ్ ||
జిహ్వా మే భద్రం వాఙ్మహో మనో మన్యుః స్వరాడ్భామః |
మోదాః ప్రమోదా అఙ్గులీరఙ్గాని మిత్రం మే సహః ||
బాహూ మే బలమిన్ద్రియఁ హస్తౌ మే కర్మ వీర్యమ్ |
ఆత్మా క్షత్రమురో మమ ||
పృష్టీర్మే రాష్ట్రముదరమఁసౌ గ్రీవాశ్చ శ్రోణీ |
ఊరూ అరత్నీ జానునీ విశో మే ఙ్గాని సర్వతః ||
నాభిర్మే చిత్తం విజ్ఞానం పాయుర్మే పచితిర్భసత్ |
ఆనన్దనన్దావాణ్డౌ మే భగః సౌభాగ్యం పసః |
జఙ్ఘాభ్యాం పాద్భ్యాం ధర్మో స్మి విశి రాజా ప్రతిష్ఠితః ||
ప్రతి క్షత్రే ప్రతి తిష్ఠామి రాష్ట్రే ప్రత్యశ్వేషు ప్రతి
తిష్ఠామి గోషు |
ప్రత్యఙ్గేషు ప్రతి తిష్ఠామ్యాత్మన్ప్రతి ప్రాణేషు క్షత్రే
ప్రతి తిష్ఠామి పుష్టే ప్రతి ద్యావాపృథివ్యోః ప్రతి తిష్ఠామి ||
త్రయా దేవా ఏకాదశ త్రయస్త్రిఁశాః సురాధసః |
బృహస్పతిపురోహితా దేవస్య సవితుః సవే |
దేవా దేవైరవన్తు మా ||
ప్రథమా ద్వితీయైర్ద్వితీయాస్తృతీయైస్తృతీయాః సత్యేన సత్యం
యజ్ఞేన యజ్ఞో యజుర్భిర్యజూఁషి సామభిః సామాన్యృగ్భిరృచః పురోనువాక్యాభిః
పురోనువాక్యా యాజ్యాభిర్యాజ్యా వషట్కారైర్వషట్కారా ఆహుతిభిరహుతయో మే
కామాన్త్సమర్ధయన్తు భూః స్వాహా ||
లోమాని ప్రయతిర్మమ త్వఙ్మ ఆనతిరాగతిః |
మాఁసం మ ఉపనతిర్వస్వస్థి మజ్జా మ ఆనతిః ||
యద్దేవా దేవహేడనం దేవాసశ్చకృమా వయమ్ |
అగ్నిర్మా తస్మాదేనసో విశ్వాన్ముఞ్చత్వఁహసః ||
యది దివా యది నక్తమేనాఁసి చకృమా వయమ్ |
వాయుర్మా తస్మాదేనసో విశ్వాన్ముఞ్చత్వఁహసః ||
యది జాగ్రద్యది స్వప్న ఏనాఁసి చకృమా వయమ్ |
సూర్యో మా తస్మాదేనసో విశ్వాన్ముఞ్చత్వఁహసః ||
యద్గ్రామే యదరణ్యే యత్సభాయాం యదిన్ద్రియే |
యచ్ఛూద్రే యదర్యే యదేనశ్చకృమా వయం యదేకస్యాధి ధర్మణి
తస్యావయజనమసి ||
యదాపో అఘ్న్యా ఇతి వరుణేతి శపామహే తతో వరుణ నో ముఞ్చ |
అవభృథ నిచుమ్పుణ నిచేరురసి నిచుమ్పుణః |
అవ దేవైర్దేవకృతమేనో యక్ష్యవ మర్త్యైర్మర్త్యకృతమ్ |
పురురావ్ణో దేవ రిషస్పాహి ||
సముద్రే తే హృదయమప్స్వన్తః సం త్వా విశన్త్వోషధీరుతాపః |
సుమిత్రియా న ఆప ఓషధయః సన్తు దుర్మిత్రియాస్తస్మై సన్తు యో
స్మాన్ద్వేష్టి యం చ వయం ద్విష్మః ||
ద్రుపదాదివ ముముచానః స్విన్నః స్నాతో మలాదివ |
పూతం పవిత్రేణేవాజ్యమాపః శున్ధన్తు మైనసః ||
ఉద్వయం తమసస్పరి స్వః పశ్యన్త ఉత్తరమ్ |
దేవం దేవత్రా సూర్యమగన్మ జ్యోతిరుత్తమమ్ ||
అపో అద్యాన్వచారిషఁ రసేన సమసృక్ష్మహి |
పయస్వానగ్న ఆగమం తం మా సఁ సృజ వర్చసా ప్రజయా చ ధనేన చ ||
ఏధో స్యేధిషీమహి |
సమిదసి తేజో సి తేజో మయి ధేహి |
సమా వవర్తి పృథివీ సముషాః సము సూర్యః |
సము విశ్వమిదం జగత్ |
వైశ్వానరజ్యోతిర్భూయాసం విభూన్కామాన్వ్యశ్నవై భూః స్వాహా ||
అభ్యా దధామి సమిధమగ్నే వ్రతపతే త్వయి |
వ్రతం చ శ్రద్ధాం చోపైమీన్ధే త్వా దీక్షితో అహమ్ ||
యత్ర బ్రహ్మ చ క్షత్రం చ సమ్యఞ్చో చరతః సహ |
తం లోకం పుణ్యం ప్ర జ్ఞేషం యత్ర దేవాః సహాగ్నినా ||
యత్రేన్ద్రశ్చ వాయుశ్చ సమ్యఞ్చో చరతః సహ |
తం లోకం పుణ్యం ప్ర జ్ఞేషం యత్ర సేదిర్న విద్యతే ||
అఁశునా తే అఁశుః పృచ్యతాం పరుషా పరుః |
గన్ధస్తే సోమమవతు మదాయ రసో అచ్యుతః ||
సిఞ్చన్తి పరి షిఞ్చన్త్యుత్సిఞ్చన్తి పునన్తి చ |
సురాయై బభ్ర్వై మదే కింత్వో వదతి కింత్వః ||
ధానావన్తం కరమ్భిణమపూపవన్తముక్థినమ్ |
ఇన్ద్ర ప్రాతర్జుషస్వ నః ||
బృహదిన్ద్రాయ గాయత మరుతో వృత్రహన్తమమ్ |
యేన జ్యోతిరజనయన్నృతావృధో దేవం దేవాయ జాగృవి ||
అధ్వర్యో అద్రిభిః సుతఁ సోమం పవిత్ర ఆ నయ |
పునీహీన్ద్రాయ పాతవే ||
యో భూతానామధిపతిర్యస్మిం లోకా అధి శ్రితాః |
య ఈశే మహతో మహాఁస్తేన గృహ్ణామి త్వామహం మయి గృహ్ణామి
త్వామహమ్ ||
ఉపయామగృహీతో స్యశ్విభ్యాం త్వా సరస్వత్యై త్వేన్ద్రాయ త్వా
సుత్రామ్ణే |
ఏష తే యోనిరశ్విభ్యాం త్వా సరస్వత్యై త్వేన్ద్రాయ త్వా
సుత్రామ్ణే ||
ప్రాణపా మే అపానపాశ్చక్షుష్పాః శ్రోత్రపాశ్చ మే |
వాచో మే విశ్వభేషజో మనసో సి విలాయకః ||
అశ్వినకృతస్య తే సరస్వతికృతస్యేన్ద్రేణ సుమ్త్రామ్ణా
కృతస్య |
ఉపహూత ఉపహూతస్య భక్షయామి ||
సమిద్ధ ఇన్ద్ర ఉషసామనీకే పురోరుచా పూర్వకృద్వావృధానః |
త్రిభిర్దేవైస్త్రిఁశతా వజ్రబాహుర్జఘాన వృత్రం వి దురో వవార ||
నరాశఁసః ప్రతి శూరో మిమానస్తనూనపాత్ప్రతి యజ్ఞస్య ధామ |
గోభిర్వపావాన్మధునా సమఞ్జన్హిరణ్యైశ్చన్ద్రీ యజతి ప్రచేతాః ||
ఈడితో దేవైర్హరివాఁ అభిష్టిరాజుహ్వానో హవిషా శర్ధమానః |
పురందరో గోతభిద్వజ్రబాహురా యాతు యజ్ఞముప నో జుషాణః ||
జుషాణో బర్హిర్హరివాన్న ఇన్ద్రః ప్రాచీనఁ సీదత్ప్రదిశా
పృథివ్యాః |
ఉరుప్రథాః ప్రథమానఁ స్యోనమాదిత్యైరక్తం వసుభిః సజోషాః ||
ఇన్ద్రం దురః కవష్యో ధావమానా వృషాణం యన్తు జనయః సుపత్నీః |
ద్వారో దేవీరభితో వి శ్రయన్తాఁ సువీరా వీరం ప్రథమానా మహోభిః ||
ఉషాసానక్తా బృహతీ బృహన్తం పయస్వతీ సుదుఘే శూరమిన్ద్రమ్ |
తన్తుం తతం పేశసా సంవయన్తీ దేవానాం దేవం యజతః సురుక్మే ||
దైవ్యా మిమానా మనుషః పురుత్రా హోతారావిన్ద్రం ప్రథమా సువాచా |
మూర్హ్దన్యజ్ఞస్య మధునా దధానా ప్రాచీనం జ్యోతిర్హవిషా
వృధాతః ||
తిస్రో దేవీర్హవిషా వర్ధమానా ఇన్ద్రం జుషాణా జనయో న పత్నీః |
అచ్ఛిన్నం తన్తుం పయసా సరస్వతీడా దేవీ భారతీ విశ్వతూర్తిః ||
త్వష్టా దధచ్ఛుష్మమిన్ద్రాయ వృష్ణే పాకో చిష్టుర్యశసే పురూణి |
వృషా యజన్వృషణం భూరిరేతా మూర్ధన్యజ్ఞస్య సమనక్తు దేవాన్ ||
వనస్పతిరవసృష్టో న పాశైస్త్మన్యా సమఞ్జఞ్ఛమితా న దేవః |
ఇన్ద్రస్య హవ్యైర్జఠరం పృణానః స్వదాతి యజ్ఞం మధునా ఘృతేన ||
స్తోకానా, ఇన్దుం ప్రతి శూర ఇన్ద్రో వృషాయమాణో
వృషభస్తురాషాట్ |
ఘృతప్రుషా మనసా మోదమానాః స్వాహా దేవా అమృతా మాదయన్తామ్ ||
ఆ యాత్విన్ద్రో వస ఉప న ఇహ స్తుతః సధమాదస్తు శూరః |
వావృధానస్తవిషీర్యస్య పూర్వీర్ద్యౌర్న క్షత్రమభిభూతి
పుష్యాత్ ||
ఆ న ఇన్ద్రో దూరాదా న ఆసాదభిష్టికృదవసే యాసదుగ్రః |
ఓజిష్ఠేభిర్నృపతిర్వజ్రబాహుః సంగే సమత్సు తుర్వణిః
పృతన్యూన్ ||
ఆ న ఇన్ద్రో హరిభిర్యాత్వచ్ఛార్వాచీనో వసే రాధసే చ |
తిష్ఠాతి వజ్రీ మఘవా విరప్శీమం యజ్ఞమను నో వాజసాతౌ ||
త్రాతారమిన్ద్రమవితారమిన్ద్రఁ హవే-హవే సుహవఁ శూరమిన్ద్రమ్ |
హ్వయామి శక్రం పురుహూతమిన్ద్రఁ స్వస్తి నో మఘవా ధాత్విన్ద్రః ||
ఇన్ద్రః సుత్రామా స్వవాఁ అవోభిః సుమృడీకో భవతు విశ్వవేదాః |
బాధతాం ద్వేషో అభయం కృణోతు సువీర్యస్య పతయః స్యామ ||
తస్య వయఁ సుమతౌ యజ్ఞియస్యాపి భద్రే సౌమనసే స్యామ |
స సుత్రామా స్వవాఁ ఇన్ద్రో అస్మే ఆరాచ్చిద్ద్వేషః
సనుతర్యుయోతు ||
ఆ మన్ద్రైరిన్ద్ర హరిభిర్యాహి మయూరరోమభిః |
మా త్వా కే చిన్ని యమన్విం నా పాశినో తి ధన్వేవ తాఁ ఇహి ||
ఏవేదిన్ద్రం వృషణం వజ్రబాహుం వసిష్ఠాసో అభ్యర్చన్త్యర్కైః |
స న స్తుతో వీరవద్ధాతు గోమద్యూయం పాత స్వస్తిభిః సదా నః ||
సమిద్ధో అగ్నిరశ్వినా తప్తో ఘర్మో విరాట్సుతః |
దుహే ధేనుః సరస్వతీ సోమఁ శుక్రమిహేన్ద్రియమ్ ||
తనూపా భిషజా సుతే స్వినోభా సరస్వతీ |
అధ్వా రజాఁసీన్ద్రియమిన్ద్రాయ పథిభిర్వహాన్ ||
ఇన్ద్రాయేన్దుఁ సరస్వతీ నరాశఁసేన నగ్నహుమ్ |
అధాతామశ్వినా మధు భేషజం భిషజా సుతే ||
ఆజుహ్వానా సరస్వతీన్ద్రాయేన్ద్రియాణి వీర్యమ్ |
ఇడాభిరశ్వినావిషఁ సమూర్జఁ సఁ రయిం దధుః ||
అశ్వినా నముచేః సుతఁ సోమఁ శుక్రం పరిస్రుతా |
సరస్వతీ తామాభరద్బర్హిషేన్ద్రాయ పాతవే ||
కవష్యో న వ్యచస్వతీరశ్విభ్యాం న దురో దిశః |
ఇన్ద్రో న రోదసీ ఉభే దుహే కామాన్త్సరస్వతీ ||
ఉషాసానక్తాశ్వినా దివేన్ద్రఁ సాయమిన్ద్రియైః |
సంజానానే సుపేశసా సమఞ్జాతే సరస్వత్యా ||
పాతం నో అశ్వినా దివా పాహి నక్తఁ సరస్వతి |
దైవ్యా హోతారా భిషజా పాతామిన్ద్రఁ సచా సుతే ||
తిస్రస్త్రేధా సరస్వత్యశ్వినా భారతీడా |
తీవ్రం పరిస్రుతా సోమమిన్ద్రాయ సుషువుర్మదమ్ ||
అశ్వినా భేషజం మధు భేషజం నః సరస్వతీ |
ఇన్ద్రే త్వష్టా యశః శ్రియఁ రూపఁ-రూపమధుః సుతే ||
ఋతుథేన్ద్రో వనస్పతిః శశమానః పరిస్రుతా |
కీలాలమశ్విభ్యాం మధు దుహే ధేనుః సరస్వతీ ||
గోభిర్న సోమమశ్వినా మాసరేణ పరిస్రుతా |
సమధాతఁ సరస్వత్యా స్వాహేన్ద్రే సుతం మధు ||
అశ్వినా హవిరిన్ద్రియం నముచేర్ధియా సరస్వతీ |
ఆ శుక్రమాసురాద్వసు మఘమిన్ద్రాయ జభ్రిరే ||
యమశ్వినా సరస్వతీ హవిషేన్ద్రమవర్ధయన్ |
స బిధేద వలం మఘం నముచావాసురే సచా ||
తమిన్ద్రఁ సచాశ్వినోభా సరస్వతీ |
దధానా అభ్యనూషత హవిషా యజ్ఞ ఇన్ద్రియైః ||
య ఇన్ద్ర ఇన్ద్రియం దధుః సవితా వరుణో భగః |
స సుత్రామా హవిష్పతిర్యజమానాయ సశ్చత ||
సవితా వరుణో దధద్యజమానాయ దాశుషే |
ఆదత్త నముచేర్వసు సుత్రామా బలమిన్ద్రియమ్ ||
వరుణః క్షత్రమిన్ద్రియం భగేన సవితా శ్రియమ్ |
సుత్రామా యశసా బలం దధానా యజ్ఞమాశత ||
అశ్వినా గోభిరిన్ద్రియమశ్వేభిర్వీర్యం బలమ్ |
హవిషేన్ద్రఁ సరస్వతీ యజమానమవర్దయన్ ||
తా నాసత్యా సుపేశసా హిరణ్యవర్తనీ నరా |
సరస్వతీ హవిష్మతీన్ద్ర కర్మసు నో వత ||
తా భిషజా సుకర్మణా సా సుదుఘా సరస్వతీ |
స వృత్రహా శతక్రతురిన్ద్రాయ దధురిన్ద్రియమ్ ||
యువఁ సురామమశ్వినా నముచావాసురే సచా |
విపిపానాః సరస్వతీన్ద్రం కర్మస్వావత ||
పుత్రమివ పితరావశ్వినోభేన్ద్రావథుః కావ్యైర్దఁసనాభిః |
యత్సురామం వ్యపిబః శచీభిః సరస్వతీ త్వా మఘవన్నభిష్ణక్ ||
యస్మిన్నశ్వాస ఋషభాస ఉక్షణో వశా మేషా అవసృష్టాస ఆహుతాః |
కీలాలపే సోమపృష్ఠాయ వేధసే హృదా మతిం జనయే చారుమగ్నయే ||
అహావ్యగ్నే హవిరాస్యే తే స్రుచీవ ఘృతం చమ్వీవ సోమః |
వాజసనిఁ రయిమస్మే సువీరం ప్రశస్తం ధేహి యశసం బృహన్తమ్ ||
అశ్వినా తేజసా చక్షుః ప్రాణేన సరస్వతీ వీర్యమ్ |
వాచేన్ద్రో బలేనేన్ద్రాయ దధురిన్ద్రియమ్ ||
గోమదూ షు ణాసత్యా అశ్వావద్యాతమశ్వినా |
వర్తీ రుద్రా నృపాయ్యమ్ ||
న యత్పరో నాన్తర ఆదధర్షద్వృషణ్వసూ |
దుఃశఁసో మర్త్యో రిపుః ||
తా న ఆ వోఢమశ్వినా రయిం పిశఙ్గసందృశమ్ |
ధిష్ణ్యా వరివోవిదమ్ ||
పావకా నః సరస్వతీ వాజేభిర్వాజినీవతీ |
యజ్ఞం వష్టు ధియావసుః ||
చోదయిత్రీ సూనృతానాం చేతన్తీ సుమతీనామ్ |
యజ్ఞం దధే సరస్వతీ ||
మహో అర్ణః సరస్వతీ ప్ర చేతయతి కేతునా |
ధియో విశ్వా వి రాజతి ||
ఇన్ద్రా యాహి చిత్రభానో సుతా ఇమే త్వాయవః |
అణ్వీభిస్తనా పూతాసః ||
ఇన్ద్రా యాహి ధియేషితో విప్రజూతః సుతావతః |
ఉప బ్రహ్మాణి వాఘతః ||
ఇన్ద్రా యాహి తూతుజాన ఉప బ్రహ్మాణి హరివః |
సుతే దధిష్వ నశ్చనః ||
అశ్వినా పిబతాం మధు సరస్వత్యా సజోషసా |
ఇన్ద్రః సుత్రామా వృత్రహా జుషన్తాఁ సోమ్యం మధు ||
| ←ముందరి అధ్యాయము | శుక్ల యజుర్వేదము | తరువాతి అధ్యాయము→ |