కనిక్రన్తి హరిర్ ఆ సృజ్యమానః సీదన్ వనస్య జఠరే పునానః |
నృభిర్ యతః కృణుతే నిర్ణిజం గా అతో మతీర్ జనయత స్వధాభిః || 9-095-01
హరిః సృజానః పథ్యామ్ ఋతస్యేయర్తి వాచమ్ అరితేవ నావమ్ |
దేవో దేవానాం గుహ్యాని నామావిష్ కృణోతి బర్హిషి ప్రవాచే || 9-095-02
అపామ్ ఇవేద్ ఊర్మయస్ తర్తురాణాః ప్ర మనీషా ఈరతే సోమమ్ అచ్ఛ |
నమస్యన్తీర్ ఉప చ యన్తి సం చా చ విశన్త్య్ ఉశతీర్ ఉశన్తమ్ || 9-095-03
తమ్ మర్మృజానమ్ మహిషం న సానావ్ అంశుం దుహన్త్య్ ఉక్షణం గిరిష్ఠామ్ |
తం వావశానమ్ మతయః సచన్తే త్రితో బిభర్తి వరుణం సముద్రే || 9-095-04
ఇష్యన్ వాచమ్ ఉపవక్తేవ హోతుః పునాన ఇన్దో వి ష్యా మనీషామ్ |
ఇన్ద్రశ్ చ యత్ క్షయథః సౌభగాయ సువీర్యస్య పతయః స్యామ || 9-095-05
