ప్ర త ఆశవః పవమాన ధీజవో మదా అర్షన్తి రఘుజా ఇవ త్మనా |
దివ్యాః సుపర్ణా మధుమన్త ఇన్దవో మదిన్తమాసః పరి కోశమ్ ఆసతే || 9-086-01
ప్ర తే మదాసో మదిరాస ఆశవో ऽసృక్షత రథ్యాసో యథా పృథక్ |
ధేనుర్ న వత్సమ్ పయసాభి వజ్రిణమ్ ఇన్ద్రమ్ ఇన్దవో మధుమన్త ఊర్మయః || 9-086-02
అత్యో న హియానో అభి వాజమ్ అర్ష స్వర్విత్ కోశం దివో అద్రిమాతరమ్ |
వృషా పవిత్రే అధి సానో అవ్యయే సోమః పునాన ఇన్ద్రియాయ ధాయసే || 9-086-03
ప్ర త ఆశ్వినీః పవమాన ధీజువో దివ్యా అసృగ్రన్ పయసా ధరీమణి |
ప్రాన్తర్ ఋషయ స్థావిరీర్ అసృక్షత యే త్వా మృజన్త్య్ ఋషిషాణ వేధసః || 9-086-04
విశ్వా ధామాని విశ్వచక్ష ఋభ్వసః ప్రభోస్ తే సతః పరి యన్తి కేతవః |
వ్యానశిః పవసే సోమ ధర్మభిః పతిర్ విశ్వస్య భువనస్య రాజసి || 9-086-05
ఉభయతః పవమానస్య రశ్మయో ధ్రువస్య సతః పరి యన్తి కేతవః |
యదీ పవిత్రే అధి మృజ్యతే హరిః సత్తా ని యోనా కలశేషు సీదతి || 9-086-06
యజ్ఞస్య కేతుః పవతే స్వధ్వరః సోమో దేవానామ్ ఉప యాతి నిష్కృతమ్ |
సహస్రధారః పరి కోశమ్ అర్షతి వృషా పవిత్రమ్ అత్య్ ఏతి రోరువత్ || 9-086-07
రాజా సముద్రం నద్యో వి గాహతే ऽపామ్ ఊర్మిం సచతే సిన్ధుషు శ్రితః |
అధ్య్ అస్థాత్ సాను పవమానో అవ్యయం నాభా పృథివ్యా ధరుణో మహో దివః || 9-086-08
దివో న సాను స్తనయన్న్ అచిక్రదద్ ద్యౌశ్ చ యస్య పృథివీ చ ధర్మభిః |
ఇన్ద్రస్య సఖ్యమ్ పవతే వివేవిదత్ సోమః పునానః కలశేషు సీదతి || 9-086-09
జ్యోతిర్ యజ్ఞస్య పవతే మధు ప్రియమ్ పితా దేవానాం జనితా విభూవసుః |
దధాతి రత్నం స్వధయోర్ అపీచ్యమ్ మదిన్తమో మత్సర ఇన్ద్రియో రసః || 9-086-10
అభిక్రన్దన్ కలశం వాజ్య్ అర్షతి పతిర్ దివః శతధారో విచక్షణః |
హరిర్ మిత్రస్య సదనేషు సీదతి మర్మృజానో ऽవిభిః సిన్ధుభిర్ వృషా || 9-086-11
అగ్రే సిన్ధూనామ్ పవమానో అర్షత్య్ అగ్రే వాచో అగ్రియో గోషు గచ్ఛతి |
అగ్రే వాజస్య భజతే మహాధనం స్వాయుధః సోతృభిః పూయతే వృషా || 9-086-12
అయమ్ మతవాఞ్ ఛకునో యథా హితో ऽవ్యే ససార పవమాన ఊర్మిణా |
తవ క్రత్వా రోదసీ అన్తరా కవే శుచిర్ ధియా పవతే సోమ ఇన్ద్ర తే || 9-086-13
ద్రాపిం వసానో యజతో దివిస్పృశమ్ అన్తరిక్షప్రా భువనేష్వ్ అర్పితః |
స్వర్ జజ్ఞానో నభసాభ్య్ అక్రమీత్ ప్రత్నమ్ అస్య పితరమ్ ఆ వివాసతి || 9-086-14
సో అస్య విశే మహి శర్మ యచ్ఛతి యో అస్య ధామ ప్రథమం వ్యానశే |
పదం యద్ అస్య పరమే వ్యోమన్య్ అతో విశ్వా అభి సం యాతి సంయతః || 9-086-15
ప్రో అయాసీద్ ఇన్దుర్ ఇన్ద్రస్య నిష్కృతం సఖా సఖ్యుర్ న ప్ర మినాతి సంగిరమ్ |
మర్య ఇవ యువతిభిః సమ్ అర్షతి సోమః కలశే శతయామ్నా పథా || 9-086-16
ప్ర వో ధియో మన్ద్రయువో విపన్యువః పనస్యువః సంవసనేష్వ్ అక్రముః |
సోమమ్ మనీషా అభ్య్ అనూషత స్తుభో ऽభి ధేనవః పయసేమ్ అశిశ్రయుః || 9-086-17
ఆ నః సోమ సంయతమ్ పిప్యుషీమ్ ఇషమ్ ఇన్దో పవస్వ పవమానో అస్రిధమ్ |
యా నో దోహతే త్రిర్ అహన్న్ అసశ్చుషీ క్షుమద్ వాజవన్ మధుమద్ సువీర్యమ్ || 9-086-18
వృషా మతీనామ్ పవతే విచక్షణః సోమో అహ్నః ప్రతరీతోషసో దివః |
క్రాణా సిన్ధూనాం కలశాఅవీవశద్ ఇన్ద్రస్య హార్ద్య్ ఆవిశన్ మనీషిభిః || 9-086-19
మనీషిభిః పవతే పూర్వ్యః కవిర్ నృభిర్ యతః పరి కోశాఅచిక్రదత్ |
త్రితస్య నామ జనయన్ మధు క్షరద్ ఇన్ద్రస్య వాయోః సఖ్యాయ కర్తవే || 9-086-20
అయమ్ పునాన ఉషసో వి రోచయద్ అయం సిన్ధుభ్యో అభవద్ ఉలోకకృత్ |
అయం త్రిః సప్త దుదుహాన ఆశిరం సోమో హృదే పవతే చారు మత్సరః || 9-086-21
పవస్వ సోమ దివ్యేషు ధామసు సృజాన ఇన్దో కలశే పవిత్ర ఆ |
సీదన్న్ ఇన్ద్రస్య జఠరే కనిక్రదన్ నృభిర్ యతః సూర్యమ్ ఆరోహయో దివి || 9-086-22
అద్రిభిః సుతః పవసే పవిత్ర ఆఇన్దవ్ ఇన్ద్రస్య జఠరేష్వ్ ఆవిశన్ |
త్వం నృచక్షా అభవో విచక్షణ సోమ గోత్రమ్ అఙ్గిరోభ్యో ऽవృణోర్ అప || 9-086-23
త్వాం సోమ పవమానం స్వాధ్యో ऽను విప్రాసో అమదన్న్ అవస్యవః |
త్వాం సుపర్ణ ఆభరద్ దివస్ పరీన్దో విశ్వాభిర్ మతిభిః పరిష్కృతమ్ || 9-086-24
అవ్యే పునానమ్ పరి వార ఊర్మిణా హరిం నవన్తే అభి సప్త ధేనవః |
అపామ్ ఉపస్థే అధ్య్ ఆయవః కవిమ్ ఋతస్య యోనా మహిషా అహేషత || 9-086-25
ఇన్దుః పునానో అతి గాహతే మృధో విశ్వాని కృణ్వన్ సుపథాని యజ్యవే |
గాః కృణ్వానో నిర్ణిజం హర్యతః కవిర్ అత్యో న క్రీళన్ పరి వారమ్ అర్షతి || 9-086-26
అసశ్చతః శతధారా అభిశ్రియో హరిం నవన్తే ऽవ తా ఉదన్యువః |
క్షిపో మృజన్తి పరి గోభిర్ ఆవృతం తృతీయే పృష్ఠే అధి రోచనే దివః || 9-086-27
తవేమాః ప్రజా దివ్యస్య రేతసస్ త్వం విశ్వస్య భువనస్య రాజసి |
అథేదం విశ్వమ్ పవమాన తే వశే త్వమ్ ఇన్దో ప్రథమో ధామధా అసి || 9-086-28
త్వం సముద్రో అసి విశ్వవిత్ కవే తవేమాః పఞ్చ ప్రదిశో విధర్మణి |
త్వం ద్యాం చ పృథివీం చాతి జభ్రిషే తవ జ్యోతీంషి పవమాన సూర్యః || 9-086-29
త్వమ్ పవిత్రే రజసో విధర్మణి దేవేభ్యః సోమ పవమాన పూయసే |
త్వామ్ ఉశిజః ప్రథమా అగృభ్ణత తుభ్యేమా విశ్వా భువనాని యేమిరే || 9-086-30
ప్ర రేభ ఏత్య్ అతి వారమ్ అవ్యయం వృషా వనేష్వ్ అవ చక్రదద్ ధరిః |
సం ధీతయో వావశానా అనూషత శిశుం రిహన్తి మతయః పనిప్నతమ్ || 9-086-31
స సూర్యస్య రశ్మిభిః పరి వ్యత తన్తుం తన్వానస్ త్రివృతం యథా విదే |
నయన్న్ ఋతస్య ప్రశిషో నవీయసీః పతిర్ జనీనామ్ ఉప యాతి నిష్కృతమ్ || 9-086-32
రాజా సిన్ధూనామ్ పవతే పతిర్ దివ ఋతస్య యాతి పథిభిః కనిక్రదత్ |
సహస్రధారః పరి షిచ్యతే హరిః పునానో వాచం జనయన్న్ ఉపావసుః || 9-086-33
పవమాన మహ్య్ అర్ణో వి ధావసి సూరో న చిత్రో అవ్యయాని పవ్యయా |
గభస్తిపూతో నృభిర్ అద్రిభిః సుతో మహే వాజాయ ధన్యాయ ధన్వసి || 9-086-34
ఇషమ్ ఊర్జమ్ పవమానాభ్య్ అర్షసి శ్యేనో న వంసు కలశేషు సీదసి |
ఇన్ద్రాయ మద్వా మద్యో మదః సుతో దివో విష్టమ్భ ఉపమో విచక్షణః || 9-086-35
సప్త స్వసారో అభి మాతరః శిశుం నవం జజ్ఞానం జేన్యం విపశ్చితమ్ |
అపాం గన్ధర్వం దివ్యం నృచక్షసం సోమం విశ్వస్య భువనస్య రాజసే || 9-086-36
ఈశాన ఇమా భువనాని వీయసే యుజాన ఇన్దో హరితః సుపర్ణ్యః |
తాస్ తే క్షరన్తు మధుమద్ ఘృతమ్ పయస్ తవ వ్రతే సోమ తిష్ఠన్తు కృష్టయః || 9-086-37
త్వం నృచక్షా అసి సోమ విశ్వతః పవమాన వృషభ తా వి ధావసి |
స నః పవస్వ వసుమద్ ధిరణ్యవద్ వయం స్యామ భువనేషు జీవసే || 9-086-38
గోవిత్ పవస్వ వసువిద్ ధిరణ్యవిద్ రేతోధా ఇన్దో భువనేష్వ్ అర్పితః |
త్వం సువీరో అసి సోమ విశ్వవిత్ తం త్వా విప్రా ఉప గిరేమ ఆసతే || 9-086-39
ఉన్ మధ్వ ఊర్మిర్ వననా అతిష్ఠిపద్ అపో వసానో మహిషో వి గాహతే |
రాజా పవిత్రరథో వాజమ్ ఆరుహత్ సహస్రభృష్టిర్ జయతి శ్రవో బృహత్ || 9-086-40
స భన్దనా ఉద్ ఇయర్తి ప్రజావతీర్ విశ్వాయుర్ విశ్వాః సుభరా అహర్దివి |
బ్రహ్మ ప్రజావద్ రయిమ్ అశ్వపస్త్యమ్ పీత ఇన్దవ్ ఇన్ద్రమ్ అస్మభ్యం యాచతాత్ || 9-086-41
సో అగ్రే అహ్నాం హరిర్ హర్యతో మదః ప్ర చేతసా చేతయతే అను ద్యుభిః |
ద్వా జనా యాతయన్న్ అన్తర్ ఈయతే నరా చ శంసం దైవ్యం చ ధర్తరి || 9-086-42
అఞ్జతే వ్య్ అఞ్జతే సమ్ అఞ్జతే క్రతుం రిహన్తి మధునాభ్య్ అఞ్జతే |
సిన్ధోర్ ఉచ్ఛ్వాసే పతయన్తమ్ ఉక్షణం హిరణ్యపావాః పశుమ్ ఆసు గృభ్ణతే || 9-086-43
విపశ్చితే పవమానాయ గాయత మహీ న ధారాత్య్ అన్ధో అర్షతి |
అహిర్ న జూర్ణామ్ అతి సర్పతి త్వచమ్ అత్యో న క్రీళన్న్ అసరద్ వృషా హరిః || 9-086-44
అగ్రేగో రాజాప్యస్ తవిష్యతే విమానో అహ్నామ్ భువనేష్వ్ అర్పితః |
హరిర్ ఘృతస్నుః సుదృశీకో అర్ణవో జ్యోతీరథః పవతే రాయ ఓక్యః || 9-086-45
అసర్జి స్కమ్భో దివ ఉద్యతో మదః పరి త్రిధాతుర్ భువనాన్య్ అర్షతి |
అంశుం రిహన్తి మతయః పనిప్నతం గిరా యది నిర్ణిజమ్ ఋగ్మిణో యయుః || 9-086-46
ప్ర తే ధారా అత్య్ అణ్వాని మేష్యః పునానస్య సంయతో యన్తి రంహయః |
యద్ గోభిర్ ఇన్దో చమ్వోః సమజ్యస ఆ సువానః సోమ కలశేషు సీదసి || 9-086-47
పవస్వ సోమ క్రతువిన్ న ఉక్థ్యో ऽవ్యో వారే పరి ధావ మధు ప్రియమ్ |
జహి విశ్వాన్ రక్షస ఇన్దో అత్రిణో బృహద్ వదేమ విదథే సువీరాః || 9-086-48
