ప్ర సోమస్య పవమానస్యోర్మయ ఇన్ద్రస్య యన్తి జఠరం సుపేశసః |
దధ్నా యద్ ఈమ్ ఉన్నీతా యశసా గవాం దానాయ శూరమ్ ఉదమన్దిషుః సుతాః || 9-081-01
అచ్ఛా హి సోమః కలశాఅసిష్యదద్ అత్యో న వోళ్హా రఘువర్తనిర్ వృషా |
అథా దేవానామ్ ఉభయస్య జన్మనో విద్వాఅశ్నోత్య్ అముత ఇతశ్ చ యత్ || 9-081-02
ఆ నః సోమ పవమానః కిరా వస్వ్ ఇన్దో భవ మఘవా రాధసో మహః |
శిక్షా వయోధో వసవే సు చేతునా మా నో గయమ్ ఆరే అస్మత్ పరా సిచః || 9-081-03
ఆ నః పూషా పవమానః సురాతయో మిత్రో గచ్ఛన్తు వరుణః సజోషసః |
బృహస్పతిర్ మరుతో వాయుర్ అశ్వినా త్వష్టా సవితా సుయమా సరస్వతీ || 9-081-04
ఉభే ద్యావాపృథివీ విశ్వమిన్వే అర్యమా దేవో అదితిర్ విధాతా |
భగో నృశంస ఉర్వ్ అన్తరిక్షం విశ్వే దేవాః పవమానం జుషన్త || 9-081-05
