ఏష ప్ర కోశే మధుమాఅచిక్రదద్ ఇన్ద్రస్య వజ్రో వపుషో వపుష్టరః |
అభీమ్ ఋతస్య సుదుఘా ఘృతశ్చుతో వాశ్రా అర్షన్తి పయసేవ ధేనవః || 9-077-01
స పూర్వ్యః పవతే యం దివస్ పరి శ్యేనో మథాయద్ ఇషితస్ తిరో రజః |
స మధ్వ ఆ యువతే వేవిజాన ఇత్ కృశానోర్ అస్తుర్ మనసాహ బిభ్యుషా || 9-077-02
తే నః పూర్వాస ఉపరాస ఇన్దవో మహే వాజాయ ధన్వన్తు గోమతే |
ఈక్షేణ్యాసో అహ్యో న చారవో బ్రహ్మ-బ్రహ్మ యే జుజుషుర్ హవిర్-హవిః || 9-077-03
అయం నో విద్వాన్ వనవద్ వనుష్యత ఇన్దుః సత్రాచా మనసా పురుష్టుతః |
ఇనస్య యః సదనే గర్భమ్ ఆదధే గవామ్ ఉరుబ్జమ్ అభ్య్ అర్షతి వ్రజమ్ || 9-077-04
చక్రిర్ దివః పవతే కృత్వ్యో రసో మహాఅదబ్ధో వరుణో హురుగ్ యతే |
అసావి మిత్రో వృజనేషు యజ్ఞియో ऽత్యో న యూథే వృషయుః కనిక్రదత్ || 9-077-05
