ధర్తా దివః పవతే కృత్వ్యో రసో దక్షో దేవానామ్ అనుమాద్యో నృభిః |
హరిః సృజానో అత్యో న సత్వభిర్ వృథా పాజాంసి కృణుతే నదీష్వ్ ఆ || 9-076-01
శూరో న ధత్త ఆయుధా గభస్త్యోః స్వః సిషాసన్ రథిరో గవిష్టిషు |
ఇన్ద్రస్య శుష్మమ్ ఈరయన్న్ అపస్యుభిర్ ఇన్దుర్ హిన్వానో అజ్యతే మనీషిభిః || 9-076-02
ఇన్ద్రస్య సోమ పవమాన ఊర్మిణా తవిష్యమాణో జఠరేష్వ్ ఆ విశ |
ప్ర ణః పిన్వ విద్యుద్ అభ్రేవ రోదసీ ధియా న వాజాఉప మాసి శశ్వతః || 9-076-03
విశ్వస్య రాజా పవతే స్వర్దృశ ఋతస్య ధీతిమ్ ఋషిషాళ్ అవీవశత్ |
యః సూర్యస్యాసిరేణ మృజ్యతే పితా మతీనామ్ అసమష్టకావ్యః || 9-076-04
వృషేవ యూథా పరి కోశమ్ అర్షస్య్ అపామ్ ఉపస్థే వృషభః కనిక్రదత్ |
స ఇన్ద్రాయ పవసే మత్సరిన్తమో యథా జేషామ సమిథే త్వోతయః || 9-076-05
