హరిమ్ మృజన్త్య్ అరుషో న యుజ్యతే సం ధేనుభిః కలశే సోమో అజ్యతే |
ఉద్ వాచమ్ ఈరయతి హిన్వతే మతీ పురుష్టుతస్య కతి చిత్ పరిప్రియః || 9-072-01
సాకం వదన్తి బహవో మనీషిణ ఇన్ద్రస్య సోమం జఠరే యద్ ఆదుహుః |
యదీ మృజన్తి సుగభస్తయో నరః సనీళాభిర్ దశభిః కామ్యమ్ మధు || 9-072-02
అరమమాణో అత్య్ ఏతి గా అభి సూర్యస్య ప్రియం దుహితుస్ తిరో రవమ్ |
అన్వ్ అస్మై జోషమ్ అభరద్ వినంగృసః సం ద్వయీభిః స్వసృభిః క్షేతి జామిభిః || 9-072-03
నృధూతో అద్రిషుతో బర్హిషి ప్రియః పతిర్ గవామ్ ప్రదివ ఇన్దుర్ ఋత్వియః |
పురంధివాన్ మనుషో యజ్ఞసాధనః శుచిర్ ధియా పవతే సోమ ఇన్ద్ర తే || 9-072-04
నృబాహుభ్యాం చోదితో ధారయా సుతో ऽనుష్వధమ్ పవతే సోమ ఇన్ద్ర తే |
ఆప్రాః క్రతూన్ సమ్ అజైర్ అధ్వరే మతీర్ వేర్ న ద్రుషచ్ చమ్వోర్ ఆసదద్ ధరిః || 9-072-05
అంశుం దుహన్తి స్తనయన్తమ్ అక్షితం కవిం కవయో ऽపసో మనీషిణః |
సమ్ ఈ గావో మతయో యన్తి సంయత ఋతస్య యోనా సదనే పునర్భువః || 9-072-06
నాభా పృథివ్యా ధరుణో మహో దివో ऽపామ్ ఊర్మౌ సిన్ధుష్వ్ అన్తర్ ఉక్షితః |
ఇన్ద్రస్య వజ్రో వృషభో విభూవసుః సోమో హృదే పవతే చారు మత్సరః || 9-072-07
స తూ పవస్వ పరి పార్థివం రజ స్తోత్రే శిక్షన్న్ ఆధూన్వతే చ సుక్రతో |
మా నో నిర్ భాగ్ వసునః సాదనస్పృశో రయిమ్ పిశఙ్గమ్ బహులం వసీమహి || 9-072-08
ఆ తూ న ఇన్దో శతదాత్వ్ అశ్వ్యం సహస్రదాతు పశుమద్ ధిరణ్యవత్ |
ఉప మాస్వ బృహతీ రేవతీర్ ఇషో ऽధి స్తోత్రస్య పవమాన నో గహి || 9-072-09
