పవస్వ విశ్వచర్షణే ऽభి విశ్వాని కావ్యా |
సఖా సఖిభ్య ఈడ్యః || 9-066-01
తాభ్యాం విశ్వస్య రాజసి యే పవమాన ధామనీ |
ప్రతీచీ సోమ తస్థతుః || 9-066-02
పరి ధామాని యాని తే త్వం సోమాసి విశ్వతః |
పవమాన ఋతుభిః కవే || 9-066-03
పవస్వ జనయన్న్ ఇషో ऽభి విశ్వాని వార్యా |
సఖా సఖిభ్య ఊతయే || 9-066-04
తవ శుక్రాసో అర్చయో దివస్ పృష్ఠే వి తన్వతే |
పవిత్రం సోమ ధామభిః || 9-066-05
తవేమే సప్త సిన్ధవః ప్రశిషం సోమ సిస్రతే |
తుభ్యం ధావన్తి ధేనవః || 9-066-06
ప్ర సోమ యాహి ధారయా సుత ఇన్ద్రాయ మత్సరః |
దధానో అక్షితి శ్రవః || 9-066-07
సమ్ ఉ త్వా ధీభిర్ అస్వరన్ హిన్వతీః సప్త జామయః |
విప్రమ్ ఆజా వివస్వతః || 9-066-08
మృజన్తి త్వా సమ్ అగ్రువో ऽవ్యే జీరావ్ అధి ష్వణి |
రేభో యద్ అజ్యసే వనే || 9-066-09
పవమానస్య తే కవే వాజిన్ సర్గా అసృక్షత |
అర్వన్తో న శ్రవస్యవః || 9-066-10
అచ్ఛా కోశమ్ మధుశ్చుతమ్ అసృగ్రం వారే అవ్యయే |
అవావశన్త ధీతయః || 9-066-11
అచ్ఛా సముద్రమ్ ఇన్దవో ऽస్తం గావో న ధేనవః |
అగ్మన్న్ ఋతస్య యోనిమ్ ఆ || 9-066-12
ప్ర ణ ఇన్దో మహే రణ ఆపో అర్షన్తి సిన్ధవః |
యద్ గోభిర్ వాసయిష్యసే || 9-066-13
అస్య తే సఖ్యే వయమ్ ఇయక్షన్తస్ త్వోతయః |
ఇన్దో సఖిత్వమ్ ఉశ్మసి || 9-066-14
ఆ పవస్వ గవిష్టయే మహే సోమ నృచక్షసే |
ఏన్ద్రస్య జఠరే విశ || 9-066-15
మహాఅసి సోమ జ్యేష్ఠ ఉగ్రాణామ్ ఇన్ద ఓజిష్ఠః |
యుధ్వా సఞ్ ఛశ్వజ్ జిగేథ || 9-066-16
య ఉగ్రేభ్యశ్ చిద్ ఓజీయాఞ్ ఛూరేభ్యశ్ చిచ్ ఛూరతరః |
భూరిదాభ్యశ్ చిన్ మంహీయాన్ || 9-066-17
త్వం సోమ సూర ఏషస్ తోకస్య సాతా తనూనామ్ |
వృణీమహే సఖ్యాయ వృణీమహే యుజ్యాయ || 9-066-18
అగ్న ఆయూంషి పవస ఆ సువోర్జమ్ ఇషం చ నః |
ఆరే బాధస్వ దుచ్ఛునామ్ || 9-066-19
అగ్నిర్ ఋషిః పవమానః పాఞ్చజన్యః పురోహితః |
తమ్ ఈమహే మహాగయమ్ || 9-066-20
అగ్నే పవస్వ స్వపా అస్మే వర్చః సువీర్యమ్ |
దధద్ రయిమ్ మయి పోషమ్ || 9-066-21
పవమానో అతి స్రిధో ऽభ్య్ అర్షతి సుష్టుతిమ్ |
సూరో న విశ్వదర్శతః || 9-066-22
స మర్మృజాన ఆయుభిః ప్రయస్వాన్ ప్రయసే హితః |
ఇన్దుర్ అత్యో విచక్షణః || 9-066-23
పవమాన ఋతమ్ బృహచ్ ఛుక్రం జ్యోతిర్ అజీజనత్ |
కృష్ణా తమాంసి జఙ్ఘనత్ || 9-066-24
పవమానస్య జఙ్ఘ్నతో హరేశ్ చన్ద్రా అసృక్షత |
జీరా అజిరశోచిషః || 9-066-25
పవమానో రథీతమః శుభ్రేభిః శుభ్రశస్తమః |
హరిశ్చన్ద్రో మరుద్గణః || 9-066-26
పవమానో వ్య్ అశ్నవద్ రశ్మిభిర్ వాజసాతమః |
దధత్ స్తోత్రే సువీర్యమ్ || 9-066-27
ప్ర సువాన ఇన్దుర్ అక్షాః పవిత్రమ్ అత్య్ అవ్యయమ్ |
పునాన ఇన్దుర్ ఇన్ద్రమ్ ఆ || 9-066-28
ఏష సోమో అధి త్వచి గవాం క్రీళత్య్ అద్రిభిః |
ఇన్ద్రమ్ మదాయ జోహువత్ || 9-066-29
యస్య తే ద్యుమ్నవత్ పయః పవమానాభృతం దివః |
తేన నో మృళ జీవసే || 9-066-30
