త్వం సోమాసి ధారయుర్ మన్ద్ర ఓజిష్ఠో అధ్వరే |
పవస్వ మంహయద్రయిః || 9-067-01
త్వం సుతో నృమాదనో దధన్వాన్ మత్సరిన్తమః |
ఇన్ద్రాయ సూరిర్ అన్ధసా || 9-067-02
త్వం సుష్వాణో అద్రిభిర్ అభ్య్ అర్ష కనిక్రదత్ |
ద్యుమన్తం శుష్మమ్ ఉత్తమమ్ || 9-067-03
ఇన్దుర్ హిన్వానో అర్షతి తిరో వారాణ్య్ అవ్యయా |
హరిర్ వాజమ్ అచిక్రదత్ || 9-067-04
ఇన్దో వ్య్ అవ్యమ్ అర్షసి వి శ్రవాంసి వి సౌభగా |
వి వాజాన్ సోమ గోమతః || 9-067-05
ఆ న ఇన్దో శతగ్వినం రయిం గోమన్తమ్ అశ్వినమ్ |
భరా సోమ సహస్రిణమ్ || 9-067-06
పవమానాస ఇన్దవస్ తిరః పవిత్రమ్ ఆశవః |
ఇన్ద్రం యామేభిర్ ఆశత || 9-067-07
కకుహః సోమ్యో రస ఇన్దుర్ ఇన్ద్రాయ పూర్వ్యః |
ఆయుః పవత ఆయవే || 9-067-08
హిన్వన్తి సూరమ్ ఉస్రయః పవమానమ్ మధుశ్చుతమ్ |
అభి గిరా సమ్ అస్వరన్ || 9-067-09
అవితా నో అజాశ్వః పూషా యామని-యామని |
ఆ భక్షత్ కన్యాసు నః || 9-067-10
అయం సోమః కపర్దినే ఘృతం న పవతే మధు |
ఆ భక్షత్ కన్యాసు నః || 9-067-11
అయం త ఆఘృణే సుతో ఘృతం న పవతే శుచి |
ఆ భక్షత్ కన్యాసు నః || 9-067-12
వాచో జన్తుః కవీనామ్ పవస్వ సోమ ధారయా |
దేవేషు రత్నధా అసి || 9-067-13
ఆ కలశేషు ధావతి శ్యేనో వర్మ వి గాహతే |
అభి ద్రోణా కనిక్రదత్ || 9-067-14
పరి ప్ర సోమ తే రసో ऽసర్జి కలశే సుతః |
శ్యేనో న తక్తో అర్షతి || 9-067-15
పవస్వ సోమ మన్దయన్న్ ఇన్ద్రాయ మధుమత్తమః || 9-067-16
అసృగ్రన్ దేవవీతయే వాజయన్తో రథా ఇవ || 9-067-17
తే సుతాసో మదిన్తమాః శుక్రా వాయుమ్ అసృక్షత || 9-067-18
గ్రావ్ణా తున్నో అభిష్టుతః పవిత్రం సోమ గచ్ఛసి |
దధత్ స్తోత్రే సువీర్యమ్ || 9-067-19
ఏష తున్నో అభిష్టుతః పవిత్రమ్ అతి గాహతే |
రక్షోహా వారమ్ అవ్యయమ్ || 9-067-20
యద్ అన్తి యచ్ చ దూరకే భయం విన్దతి మామ్ ఇహ |
పవమాన వి తజ్ జహి || 9-067-21
పవమానః సో అద్య నః పవిత్రేణ విచర్షణిః |
యః పోతా స పునాతు నః || 9-067-22
యత్ తే పవిత్రమ్ అర్చిష్య్ అగ్నే వితతమ్ అన్తర్ ఆ |
బ్రహ్మ తేన పునీహి నః || 9-067-23
యత్ తే పవిత్రమ్ అర్చివద్ అగ్నే తేన పునీహి నః |
బ్రహ్మసవైః పునీహి నః || 9-067-24
ఉభాభ్యాం దేవ సవితః పవిత్రేణ సవేన చ |
మామ్ పునీహి విశ్వతః || 9-067-25
త్రిభిష్ ట్వం దేవ సవితర్ వర్షిష్ఠైః సోమ ధామభిః |
అగ్నే దక్షైః పునీహి నః || 9-067-26
పునన్తు మాం దేవజనాః పునన్తు వసవో ధియా |
విశ్వే దేవాః పునీత మా జాతవేదః పునీహి మా || 9-067-27
ప్ర ప్యాయస్వ ప్ర స్యన్దస్వ సోమ విశ్వేభిర్ అంశుభిః |
దేవేభ్య ఉత్తమం హవిః || 9-067-28
ఉప ప్రియమ్ పనిప్నతం యువానమ్ ఆహుతీవృధమ్ |
అగన్మ బిభ్రతో నమః || 9-067-29
అలాయ్యస్య పరశుర్ ననాశ తమ్ ఆ పవస్వ దేవ సోమ |
ఆఖుం చిద్ ఏవ దేవ సోమ || 9-067-30
యః పావమానీర్ అధ్యేత్య్ ఋషిభిః సమ్భృతం రసమ్ |
సర్వం స పూతమ్ అశ్నాతి స్వదితమ్ మాతరిశ్వనా || 9-067-31
పావమానీర్ యో అధ్యేత్య్ ఋషిభిః సమ్భృతం రసమ్ |
తస్మై సరస్వతీ దుహే క్షీరం సర్పిర్ మధూదకమ్ || 9-067-32
