సమిద్ధో విశ్వతస్ పతిః పవమానో వి రాజతి |
ప్రీణన్ వృషా కనిక్రదత్ || 9-005-01
తనూనపాత్ పవమానః శృఙ్గే శిశానో అర్షతి |
అన్తరిక్షేణ రారజత్ || 9-005-02
ఈళేన్యః పవమానో రయిర్ వి రాజతి ద్యుమాన్ |
మధోర్ ధారాభిర్ ఓజసా || 9-005-03
బర్హిః ప్రాచీనమ్ ఓజసా పవమాన స్తృణన్ హరిః |
దేవేషు దేవ ఈయతే || 9-005-04
ఉద్ ఆతైర్ జిహతే బృహద్ ద్వారో దేవీర్ హిరణ్యయీః |
పవమానేన సుష్టుతాః || 9-005-05
సుశిల్పే బృహతీ మహీ పవమానో వృషణ్యతి |
నక్తోషాసా న దర్శతే || 9-005-06
ఉభా దేవా నృచక్షసా హోతారా దైవ్యా హువే |
పవమాన ఇన్ద్రో వృషా || 9-005-07
భారతీ పవమానస్య సరస్వతీళా మహీ |
ఇమం నో యజ్ఞమ్ ఆ గమన్ తిస్రో దేవీః సుపేశసః || 9-005-08
త్వష్టారమ్ అగ్రజాం గోపామ్ పురోయావానమ్ ఆ హువే |
ఇన్దుర్ ఇన్ద్రో వృషా హరిః పవమానః ప్రజాపతిః || 9-005-09
వనస్పతిమ్ పవమాన మధ్వా సమ్ అఙ్గ్ధి ధారయా |
సహస్రవల్శం హరితమ్ భ్రాజమానం హిరణ్యయమ్ || 9-005-10
విశ్వే దేవాః స్వాహాకృతిమ్ పవమానస్యా గత |
వాయుర్ బృహస్పతిః సూర్యో ऽగ్నిర్ ఇన్ద్రః సజోషసః || 9-005-11
