యత్ సోమ చిత్రమ్ ఉక్థ్యం దివ్యమ్ పార్థివం వసు |
తన్ నః పునాన ఆ భర || 9-019-01
యువం హి స్థః స్వర్పతీ ఇన్ద్రశ్ చ సోమ గోపతీ |
ఈశానా పిప్యతం ధియః || 9-019-02
వృషా పునాన ఆయుషు స్తనయన్న్ అధి బర్హిషి |
హరిః సన్ యోనిమ్ ఆసదత్ || 9-019-03
అవావశన్త ధీతయో వృషభస్యాధి రేతసి |
సూనోర్ వత్సస్య మాతరః || 9-019-04
కువిద్ వృషణ్యన్తీభ్యః పునానో గర్భమ్ ఆదధత్ |
యాః శుక్రం దుహతే పయః || 9-019-05
ఉప శిక్షాపతస్థుషో భియసమ్ ఆ ధేహి శత్రుషు |
పవమాన విదా రయిమ్ || 9-019-06
ని శత్రోః సోమ వృష్ణ్యం ని శుష్మం ని వయస్ తిర |
దూరే వా సతో అన్తి వా || 9-019-07
