సోమా అసృగ్రమ్ ఇన్దవః సుతా ఋతస్య సాదనే |
ఇన్ద్రాయ మధుమత్తమాః || 9-012-01
అభి విప్రా అనూషత గావో వత్సం న మాతరః |
ఇన్ద్రం సోమస్య పీతయే || 9-012-02
మదచ్యుత్ క్షేతి సాదనే సిన్ధోర్ ఊర్మా విపశ్చిత్ |
సోమో గౌరీ అధి శ్రితః || 9-012-03
దివో నాభా విచక్షణో ऽవ్యో వారే మహీయతే |
సోమో యః సుక్రతుః కవిః || 9-012-04
యః సోమః కలశేష్వ్ ఆఅన్తః పవిత్ర ఆహితః |
తమ్ ఇన్దుః పరి షస్వజే || 9-012-05
ప్ర వాచమ్ ఇన్దుర్ ఇష్యతి సముద్రస్యాధి విష్టపి |
జిన్వన్ కోశమ్ మధుశ్చుతమ్ || 9-012-06
నిత్యస్తోత్రో వనస్పతిర్ ధీనామ్ అన్తః సబర్దుఘః |
హిన్వానో మానుషా యుగా || 9-012-07
అభి ప్రియా దివస్ పదా సోమో హిన్వానో అర్షతి |
విప్రస్య ధారయా కవిః || 9-012-08
ఆ పవమాన ధారయ రయిం సహస్రవర్చసమ్ |
అస్మే ఇన్దో స్వాభువమ్ || 9-012-09
