సోమః పునానో అర్షతి సహస్రధారో అత్యవిః |
వాయోర్ ఇన్ద్రస్య నిష్కృతమ్ || 9-013-01
పవమానమ్ అవస్యవో విప్రమ్ అభి ప్ర గాయత |
సుష్వాణం దేవవీతయే || 9-013-02
పవన్తే వాజసాతయే సోమాః సహస్రపాజసః |
గృణానా దేవవీతయే || 9-013-03
ఉత నో వాజసాతయే పవస్వ బృహతీర్ ఇషః |
ద్యుమద్ ఇన్దో సువీర్యమ్ || 9-013-04
తే నః సహస్రిణం రయిమ్ పవన్తామ్ ఆ సువీర్యమ్ |
సువానా దేవాస ఇన్దవః || 9-013-05
అత్యా హియానా న హేతృభిర్ అసృగ్రం వాజసాతయే |
వి వారమ్ అవ్యమ్ ఆశవః || 9-013-06
వాశ్రా అర్షన్తీన్దవో ऽభి వత్సం న ధేనవః |
దధన్విరే గభస్త్యోః || 9-013-07
జుష్ట ఇన్ద్రాయ మత్సరః పవమాన కనిక్రదత్ |
విశ్వా అప ద్విషో జహి || 9-013-08
అపఘ్నన్తో అరావ్ణః పవమానాః స్వర్దృశః |
యోనావ్ ఋతస్య సీదత || 9-013-09
