అయా రుచా హరిణ్యా పునానో విశ్వా ద్వేషాంసి తరతి స్వయుగ్వభిః సూరో న స్వయుగ్వభిః |
ధారా సుతస్య రోచతే పునానో అరుషో హరిః |
విశ్వా యద్ రూపా పరియాత్య్ ఋక్వభిః సప్తాస్యేభిర్ ఋక్వభిః || 9-111-01
త్వం త్యత్ పణీనాం విదో వసు సమ్ మాతృభిర్ మర్జయసి స్వ ఆ దమ ఋతస్య ధీతిభిర్ దమే |
పరావతో న సామ తద్ యత్రా రణన్తి ధీతయః |
త్రిధాతుభిర్ అరుషీభిర్ వయో దధే రోచమానో వయో దధే || 9-111-02
పూర్వామ్ అను ప్రదిశం యాతి చేకితత్ సం రశ్మిభిర్ యతతే దర్శతో రథో |
దైవ్యో దర్శతో రథః |
అగ్మన్న్ ఉక్థాని పౌంస్యేన్ద్రం జైత్రాయ హర్షయన్ |
వజ్రశ్ చ యద్ భవథో అనపచ్యుతా సమత్స్వ్ అనపచ్యుతా || 9-111-03
