ఇన్ద్రమ్ అచ్ఛ సుతా ఇమే వృషణం యన్తు హరయః |
శ్రుష్టీ జాతాస ఇన్దవః స్వర్విదః || 9-106-01
అయమ్ భరాయ సానసిర్ ఇన్ద్రాయ పవతే సుతః |
సోమో జైత్రస్య చేతతి యథా విదే || 9-106-02
అస్యేద్ ఇన్ద్రో మదేష్వ్ ఆ గ్రాభం గృభ్ణీత సానసిమ్ |
వజ్రం చ వృషణమ్ భరత్ సమ్ అప్సుజిత్ || 9-106-03
ప్ర ధన్వా సోమ జాగృవిర్ ఇన్ద్రాయేన్దో పరి స్రవ |
ద్యుమన్తం శుష్మమ్ ఆ భరా స్వర్విదమ్ || 9-106-04
ఇన్ద్రాయ వృషణమ్ మదమ్ పవస్వ విశ్వదర్శతః |
సహస్రయామా పథికృద్ విచక్షణః || 9-106-05
అస్మభ్యం గాతువిత్తమో దేవేభ్యో మధుమత్తమః |
సహస్రం యాహి పథిభిః కనిక్రదత్ || 9-106-06
పవస్వ దేవవీతయ ఇన్దో ధారాభిర్ ఓజసా |
ఆ కలశమ్ మధుమాన్ సోమ నః సదః || 9-106-07
తవ ద్రప్సా ఉదప్రుత ఇన్ద్రమ్ మదాయ వావృధుః |
త్వాం దేవాసో అమృతాయ కమ్ పపుః || 9-106-08
ఆ నః సుతాస ఇన్దవః పునానా ధావతా రయిమ్ |
వృష్టిద్యావో రీత్యాపః స్వర్విదః || 9-106-09
సోమః పునాన ఊర్మిణావ్యో వారం వి ధావతి |
అగ్రే వాచః పవమానః కనిక్రదత్ || 9-106-10
ధీభిర్ హిన్వన్తి వాజినం వనే క్రీళన్తమ్ అత్యవిమ్ |
అభి త్రిపృష్ఠమ్ మతయః సమ్ అస్వరన్ || 9-106-11
అసర్జి కలశాఅభి మీళ్హే సప్తిర్ న వాజయుః |
పునానో వాచం జనయన్న్ అసిష్యదత్ || 9-106-12
పవతే హర్యతో హరిర్ అతి హ్వరాంసి రంహ్యా |
అభ్యర్షన్ స్తోతృభ్యో వీరవద్ యశః || 9-106-13
అయా పవస్వ దేవయుర్ మధోర్ ధారా అసృక్షత |
రేభన్ పవిత్రమ్ పర్య్ ఏషి విశ్వతః || 9-106-14
