యా ఇన్ద్ర భుజ ఆభరః స్వర్వాఅసురేభ్యః |
స్తోతారమ్ ఇన్ మఘవన్న్ అస్య వర్ధయ యే చ త్వే వృక్తబర్హిషః || 8-097-01
యమ్ ఇన్ద్ర దధిషే త్వమ్ అశ్వం గామ్ భాగమ్ అవ్యయమ్ |
యజమానే సున్వతి దక్షిణావతి తస్మిన్ తం ధేహి మా పణౌ || 8-097-02
య ఇన్ద్ర సస్త్య్ అవ్రతో ऽనుష్వాపమ్ అదేవయుః |
స్వైః ష ఏవైర్ ముమురత్ పోష్యం రయిం సనుతర్ ధేహి తం తతః || 8-097-03
యచ్ ఛక్రాసి పరావతి యద్ అర్వావతి వృత్రహన్ |
అతస్ త్వా గీర్భిర్ ద్యుగద్ ఇన్ద్ర కేశిభిః సుతావాఆ వివాసతి || 8-097-04
యద్ వాసి రోచనే దివః సముద్రస్యాధి విష్టపి |
యత్ పార్థివే సదనే వృత్రహన్తమ యద్ అన్తరిక్ష ఆ గహి || 8-097-05
స నః సోమేషు సోమపాః సుతేషు శవసస్ పతే |
మాదయస్వ రాధసా సూనృతావతేన్ద్ర రాయా పరీణసా || 8-097-06
మా న ఇన్ద్ర పరా వృణగ్ భవా నః సధమాద్యః |
త్వం న ఊతీ త్వమ్ ఇన్ న ఆప్యమ్ మా న ఇన్ద్ర పరా వృణక్ || 8-097-07
అస్మే ఇన్ద్ర సచా సుతే ని షదా పీతయే మధు |
కృధీ జరిత్రే మఘవన్న్ అవో మహద్ అస్మే ఇన్ద్ర సచా సుతే || 8-097-08
న త్వా దేవాస ఆశత న మర్త్యాసో అద్రివః |
విశ్వా జాతాని శవసాభిభూర్ అసి న త్వా దేవాస ఆశత || 8-097-09
విశ్వాః పృతనా అభిభూతరం నరం |
సజూస్ తతక్షుర్ ఇన్ద్రం జజనుశ్ చ రాజసే |
క్రత్వా వరిష్ఠం వర ఆమురిమ్ ఉతోగ్రమ్ ఓజిష్ఠం తవసం తరస్వినమ్ || 8-097-10
సమ్ ఈం రేభాసో అస్వరన్న్ ఇన్ద్రం సోమస్య పీతయే |
స్వర్పతిం యద్ ఈం వృధే ధృతవ్రతో హ్య్ ఓజసా సమ్ ఊతిభిః || 8-097-11
నేమిం నమన్తి చక్షసా మేషం విప్రా అభిస్వరా |
సుదీతయో వో అద్రుహో ऽపి కర్ణే తరస్వినః సమ్ ఋక్వభిః || 8-097-12
తమ్ ఇన్ద్రం జోహవీమి మఘవానమ్ ఉగ్రం |
సత్రా దధానమ్ అప్రతిష్కుతం శవాంసి |
మంహిష్ఠో గీర్భిర్ ఆ చ యజ్ఞియో వవర్తద్ |
రాయే నో విశ్వా సుపథా కృణోతు వజ్రీ || 8-097-13
త్వమ్ పుర ఇన్ద్ర చికిద్ ఏనా వ్య్ ఓజసా శవిష్ఠ శక్ర నాశయధ్యై |
త్వద్ విశ్వాని భువనాని వజ్రిన్ ద్యావా రేజేతే పృథివీ చ భీషా || 8-097-14
తన్ మ ఋతమ్ ఇన్ద్ర శూర చిత్ర పాత్వ్ అపో న వజ్రిన్ దురితాతి పర్షి భూరి |
కదా న ఇన్ద్ర రాయ ఆ దశస్యేర్ విశ్వప్స్న్యస్య స్పృహయాయ్యస్య రాజన్ || 8-097-15
