ఉద్ ఘేద్ అభి శ్రుతామఘం వృషభం నర్యాపసమ్ |
అస్తారమ్ ఏషి సూర్య || 8-093-01
నవ యో నవతిమ్ పురో బిభేద బాహ్వోజసా |
అహిం చ వృత్రహావధీత్ || 8-093-02
స న ఇన్ద్రః శివః సఖాశ్వావద్ గోమద్ యవమత్ |
ఉరుధారేవ దోహతే || 8-093-03
యద్ అద్య కచ్ చ వృత్రహన్న్ ఉదగా అభి సూర్య |
సర్వం తద్ ఇన్ద్ర తే వశే || 8-093-04
యద్ వా ప్రవృద్ధ సత్పతే న మరా ఇతి మన్యసే |
ఉతో తత్ సత్యమ్ ఇత్ తవ || 8-093-05
యే సోమాసః పరావతి యే అర్వావతి సున్విరే |
సర్వాంస్ తాఇన్ద్ర గచ్ఛసి || 8-093-06
తమ్ ఇన్ద్రం వాజయామసి మహే వృత్రాయ హన్తవే |
స వృషా వృషభో భువత్ || 8-093-07
ఇన్ద్రః స దామనే కృత ఓజిష్ఠః స మదే హితః |
ద్యుమ్నీ శ్లోకీ స సోమ్యః || 8-093-08
గిరా వజ్రో న సమ్భృతః సబలో అనపచ్యుతః |
వవక్ష ఋష్వో అస్తృతః || 8-093-09
దుర్గే చిన్ నః సుగం కృధి గృణాన ఇన్ద్ర గిర్వణః |
త్వం చ మఘవన్ వశః || 8-093-10
యస్య తే నూ చిద్ ఆదిశం న మినన్తి స్వరాజ్యమ్ |
న దేవో నాధ్రిగుర్ జనః || 8-093-11
అధా తే అప్రతిష్కుతం దేవీ శుష్మం సపర్యతః |
ఉభే సుశిప్ర రోదసీ || 8-093-12
త్వమ్ ఏతద్ అధారయః కృష్ణాసు రోహిణీషు చ |
పరుష్ణీషు రుశత్ పయః || 8-093-13
వి యద్ అహేర్ అధ త్విషో విశ్వే దేవాసో అక్రముః |
విదన్ మృగస్య తాఅమః || 8-093-14
ఆద్ ఉ మే నివరో భువద్ వృత్రహాదిష్ట పౌంస్యమ్ |
అజాతశత్రుర్ అస్తృతః || 8-093-15
శ్రుతం వో వృత్రహన్తమమ్ ప్ర శర్ధం చర్షణీనామ్ |
ఆ శుషే రాధసే మహే || 8-093-16
అయా ధియా చ గవ్యయా పురుణామన్ పురుష్టుత |
యత్ సోమే-సోమ ఆభవః || 8-093-17
బోధిన్మనా ఇద్ అస్తు నో వృత్రహా భూర్యాసుతిః |
శృణోతు శక్ర ఆశిషమ్ || 8-093-18
కయా త్వం న ఊత్యాభి ప్ర మన్దసే వృషన్ |
కయా స్తోతృభ్య ఆ భర || 8-093-19
కస్య వృషా సుతే సచా నియుత్వాన్ వృషభో రణత్ |
వృత్రహా సోమపీతయే || 8-093-20
అభీ షు ణస్ త్వం రయిమ్ మన్దసానః సహస్రిణమ్ |
ప్రయన్తా బోధి దాశుషే || 8-093-21
పత్నీవన్తః సుతా ఇమ ఉశన్తో యన్తి వీతయే |
అపాం జగ్మిర్ నిచుమ్పుణః || 8-093-22
ఇష్టా హోత్రా అసృక్షతేన్ద్రం వృధాసో అధ్వరే |
అచ్ఛావభృథమ్ ఓజసా || 8-093-23
ఇహ త్యా సధమాద్యా హరీ హిరణ్యకేశ్యా |
వోళ్హామ్ అభి ప్రయో హితమ్ || 8-093-24
తుభ్యం సోమాః సుతా ఇమే స్తీర్ణమ్ బర్హిర్ విభావసో |
స్తోతృభ్య ఇన్ద్రమ్ ఆ వహ || 8-093-25
ఆ తే దక్షం వి రోచనా దధద్ రత్నా వి దాశుషే |
స్తోతృభ్య ఇన్ద్రమ్ అర్చత || 8-093-26
ఆ తే దధామీన్ద్రియమ్ ఉక్థా విశ్వా శతక్రతో |
స్తోతృభ్య ఇన్ద్ర మృళయ || 8-093-27
భద్రమ్-భద్రం న ఆ భరేషమ్ ఊర్జం శతక్రతో |
యద్ ఇన్ద్ర మృళయాసి నః || 8-093-28
స నో విశ్వాన్య్ ఆ భర సువితాని శతక్రతో |
యద్ ఇన్ద్ర మృళయాసి నః || 8-093-29
త్వామ్ ఇద్ వృత్రహన్తమ సుతావన్తో హవామహే |
యద్ ఇన్ద్ర మృళయాసి నః || 8-093-30
ఉప నో హరిభిః సుతం యాహి మదానామ్ పతే |
ఉప నో హరిభిః సుతమ్ || 8-093-31
ద్వితా యో వృత్రహన్తమో విద ఇన్ద్రః శతక్రతుః |
ఉప నో హరిభిః సుతమ్ || 8-093-32
త్వం హి వృత్రహన్న్ ఏషామ్ పాతా సోమానామ్ అసి |
ఉప నో హరిభిః సుతమ్ || 8-093-33
ఇన్ద్ర ఇషే దదాతు న ఋభుక్షణమ్ ఋభుం రయిమ్ |
వాజీ దదాతు వాజినమ్ || 8-093-34
