ఆ నూనమ్ అశ్వినా యువం వత్సస్య గన్తమ్ అవసే |
ప్రాస్మై యచ్ఛతమ్ అవృకమ్ పృథు ఛర్దిర్ యుయుతం యా అరాతయః || 8-009-01
యద్ అన్తరిక్షే యద్ దివి యత్ పఞ్చ మానుషాఅను |
నృమ్ణం తద్ ధత్తమ్ అశ్వినా || 8-009-02
యే వాం దంసాంస్య్ అశ్వినా విప్రాసః పరిమామృశుః |
ఏవేత్ కాణ్వస్య బోధతమ్ || 8-009-03
అయం వాం ఘర్మో అశ్వినా స్తోమేన పరి షిచ్యతే |
అయం సోమో మధుమాన్ వాజినీవసూ యేన వృత్రం చికేతథః || 8-009-04
యద్ అప్సు యద్ వనస్పతౌ యద్ ఓషధీషు పురుదంససా కృతమ్ |
తేన మావిష్టమ్ అశ్వినా || 8-009-05
యన్ నాసత్యా భురణ్యథో యద్ వా దేవ భిషజ్యథః |
అయం వాం వత్సో మతిభిర్ న విన్ధతే హవిష్మన్తం హి గచ్ఛథః || 8-009-06
ఆ నూనమ్ అశ్వినోర్ ఋషి స్తోమం చికేత వామయా |
ఆ సోమమ్ మధుమత్తమం ఘర్మం సిఞ్చాద్ అథర్వణి || 8-009-07
ఆ నూనం రఘువర్తనిం రథం తిష్ఠాథో అశ్వినా |
ఆ వాం స్తోమా ఇమే మమ నభో న చుచ్యవీరత || 8-009-08
యద్ అద్య వాం నాసత్యోక్థైర్ ఆచుచ్యువీమహి |
యద్ వా వాణీభిర్ అశ్వినేవేత్ కాణ్వస్య బోధతమ్ || 8-009-09
యద్ వాం కక్షీవాఉత యద్ వ్యశ్వ ఋషిర్ యద్ వాం దీర్ఘతమా జుహావ |
పృథీ యద్ వాం వైన్యః సాదనేష్వ్ ఏవేద్ అతో అశ్వినా చేతయేథామ్ || 8-009-10
యాతం ఛర్దిష్పా ఉత నః పరస్పా భూతం జగత్పా ఉత నస్ తనూపా |
వర్తిస్ తోకాయ తనయాయ యాతమ్ || 8-009-11
యద్ ఇన్ద్రేణ సరథం యాథో అశ్వినా యద్ వా వాయునా భవథః సమోకసా |
యద్ ఆదిత్యేభిర్ ఋభుభిః సజోషసా యద్ వా విష్ణోర్ విక్రమణేషు తిష్ఠథః || 8-009-12
యద్ అద్యాశ్వినావ్ అహం హువేయ వాజసాతయే |
యత్ పృత్సు తుర్వణే సహస్ తచ్ ఛ్రేష్ఠమ్ అశ్వినోర్ అవః || 8-009-13
ఆ నూనం యాతమ్ అశ్వినేమా హవ్యాని వాం హితా |
ఇమే సోమాసో అధి తుర్వశే యదావ్ ఇమే కణ్వేషు వామ్ అథ || 8-009-14
యన్ నాసత్యా పరాకే అర్వాకే అస్తి భేషజమ్ |
తేన నూనం విమదాయ ప్రచేతసా ఛర్దిర్ వత్సాయ యచ్ఛతమ్ || 8-009-15
అభుత్స్య్ ఉ ప్ర దేవ్యా సాకం వాచాహమ్ అశ్వినోః |
వ్య్ ఆవర్ దేవ్య్ ఆ మతిం వి రాతిమ్ మర్త్యేభ్యః || 8-009-16
ప్ర బోధయోషో అశ్వినా ప్ర దేవి సూనృతే మహి |
ప్ర యజ్ఞహోతర్ ఆనుషక్ ప్ర మదాయ శ్రవో బృహత్ || 8-009-17
యద్ ఉషో యాసి భానునా సం సూర్యేణ రోచసే |
ఆ హాయమ్ అశ్వినో రథో వర్తిర్ యాతి నృపాయ్యమ్ || 8-009-18
యద్ ఆపీతాసో అంశవో గావో న దుహ్ర ఊధభిః |
యద్ వా వాణీర్ అనూషత ప్ర దేవయన్తో అశ్వినా || 8-009-19
ప్ర ద్యుమ్నాయ ప్ర శవసే ప్ర నృషాహ్యాయ శర్మణే |
ప్ర దక్షాయ ప్రచేతసా || 8-009-20
యన్ నూనం ధీభిర్ అశ్వినా పితుర్ యోనా నిషీదథః |
యద్ వా సుమ్నేభిర్ ఉక్థ్యా || 8-009-21
