తం వో దస్మమ్ ఋతీషహం వసోర్ మన్దానమ్ అన్ధసః |
అభి వత్సం న స్వసరేషు ధేనవ ఇన్ద్రం గీర్భిర్ నవామహే || 8-088-01
ద్యుక్షం సుదానుం తవిషీభిర్ ఆవృతం గిరిం న పురుభోజసమ్ |
క్షుమన్తం వాజం శతినం సహస్రిణమ్ మక్షూ గోమన్తమ్ ఈమహే || 8-088-02
న త్వా బృహన్తో అద్రయో వరన్త ఇన్ద్ర వీళవః |
యద్ దిత్ససి స్తువతే మావతే వసు నకిష్ టద్ ఆ మినాతి తే || 8-088-03
యోద్ధాసి క్రత్వా శవసోత దంసనా విశ్వా జాతాభి మజ్మనా |
ఆ త్వాయమ్ అర్క ఊతయే వవర్తతి యం గోతమా అజీజనన్ || 8-088-04
ప్ర హి రిరిక్ష ఓజసా దివో అన్తేభ్యస్ పరి |
న త్వా వివ్యాచ రజ ఇన్ద్ర పార్థివమ్ అను స్వధాం వవక్షిథ || 8-088-05
నకిః పరిష్టిర్ మఘవన్ మఘస్య తే యద్ దాశుషే దశస్యసి |
అస్మాకమ్ బోధ్య్ ఉచథస్య చోదితా మంహిష్ఠో వాజసాతయే || 8-088-06
