నహ్య్ అన్యమ్ బళాకరమ్ మర్డితారం శతక్రతో |
త్వం న ఇన్ద్ర మృళయ || 8-080-01
యో నః శశ్వత్ పురావిథామృధ్రో వాజసాతయే |
స త్వం న ఇన్ద్ర మృళయ || 8-080-02
కిమ్ అఙ్గ రధ్రచోదనః సున్వానస్యావితేద్ అసి |
కువిత్ స్వ్ ఐన్ద్ర ణః శకః || 8-080-03
ఇన్ద్ర ప్ర ణో రథమ్ అవ పశ్చాచ్ చిత్ సన్తమ్ అద్రివః |
పురస్తాద్ ఏనమ్ మే కృధి || 8-080-04
హన్తో ను కిమ్ ఆససే ప్రథమం నో రథం కృధి |
ఉపమం వాజయు శ్రవః || 8-080-05
అవా నో వాజయుం రథం సుకరం తే కిమ్ ఇత్ పరి |
అస్మాన్ సు జిగ్యుషస్ కృధి || 8-080-06
ఇన్ద్ర దృహ్యస్వ పూర్ అసి భద్రా త ఏతి నిష్కృతమ్ |
ఇయం ధీర్ ఋత్వియావతీ || 8-080-07
మా సీమ్ అవద్య ఆ భాగ్ ఉర్వీ కాష్ఠా హితం ధనమ్ |
అపావృక్తా అరత్నయః || 8-080-08
తురీయం నామ యజ్ఞియం యదా కరస్ తద్ ఉశ్మసి |
ఆద్ ఇత్ పతిర్ న ఓహసే || 8-080-09
అవీవృధద్ వో అమృతా అమన్దీద్ ఏకద్యూర్ దేవా ఉత యాశ్ చ దేవీః |
తస్మా ఉ రాధః కృణుత ప్రశస్తమ్ ప్రాతర్ మక్షూ ధియావసుర్ జగమ్యాత్ || 8-080-10
