పురోళాశం నో అన్ధస ఇన్ద్ర సహస్రమ్ ఆ భర |
శతా చ శూర గోనామ్ || 8-078-01
ఆ నో భర వ్యఞ్జనం గామ్ అశ్వమ్ అభ్యఞ్జనమ్ |
సచా మనా హిరణ్యయా || 8-078-02
ఉత నః కర్ణశోభనా పురూణి ధృష్ణవ్ ఆ భర |
త్వం హి శృణ్విషే వసో || 8-078-03
నకీం వృధీక ఇన్ద్ర తే న సుషా న సుదా ఉత |
నాన్యస్ త్వచ్ ఛూర వాఘతః || 8-078-04
నకీమ్ ఇన్ద్రో నికర్తవే న శక్రః పరిశక్తవే |
విశ్వం శృణోతి పశ్యతి || 8-078-05
స మన్యుమ్ మర్త్యానామ్ అదబ్ధో ని చికీషతే |
పురా నిదశ్ చికీషతే || 8-078-06
క్రత్వ ఇత్ పూర్ణమ్ ఉదరం తురస్యాస్తి విధతః |
వృత్రఘ్నః సోమపావ్నః || 8-078-07
త్వే వసూని సంగతా విశ్వా చ సోమ సౌభగా |
సుదాత్వ్ అపరిహ్వృతా || 8-078-08
త్వామ్ ఇద్ యవయుర్ మమ కామో గవ్యుర్ హిరణ్యయుః |
త్వామ్ అశ్వయుర్ ఏషతే || 8-078-09
తవేద్ ఇన్ద్రాహమ్ ఆశసా హస్తే దాత్రం చనా దదే |
దినస్య వా మఘవన్ సమ్భృతస్య వా పూర్ధి యవస్య కాశినా || 8-078-10
