జజ్ఞానో ను శతక్రతుర్ వి పృచ్ఛద్ ఇతి మాతరమ్ |
క ఉగ్రాః కే హ శృణ్విరే || 8-077-01
ఆద్ ఈం శవస్య్ అబ్రవీద్ ఔర్ణవాభమ్ అహీశువమ్ |
తే పుత్ర సన్తు నిష్టురః || 8-077-02
సమ్ ఇత్ తాన్ వృత్రహాఖిదత్ ఖే అరాఇవ ఖేదయా |
ప్రవృద్ధో దస్యుహాభవత్ || 8-077-03
ఏకయా ప్రతిధాపిబత్ సాకం సరాంసి త్రింశతమ్ |
ఇన్ద్రః సోమస్య కాణుకా || 8-077-04
అభి గన్ధర్వమ్ అతృణద్ అబుధ్నేషు రజస్స్వ్ ఆ |
ఇన్ద్రో బ్రహ్మభ్య ఇద్ వృధే || 8-077-05
నిర్ ఆవిధ్యద్ గిరిభ్య ఆ ధారయత్ పక్వమ్ ఓదనమ్ |
ఇన్ద్రో బున్దం స్వాతతమ్ || 8-077-06
శతబ్రధ్న ఇషుస్ తవ సహస్రపర్ణ ఏక ఇత్ |
యమ్ ఇన్ద్ర చకృషే యుజమ్ || 8-077-07
తేన స్తోతృభ్య ఆ భర నృభ్యో నారిభ్యో అత్తవే |
సద్యో జాత ఋభుష్ఠిర || 8-077-08
ఏతా చ్యౌత్నాని తే కృతా వర్షిష్ఠాని పరీణసా |
హృదా వీడ్వ్ అధారయః || 8-077-09
విశ్వేత్ తా విష్ణుర్ ఆభరద్ ఉరుక్రమస్ త్వేషితః |
శతమ్ మహిషాన్ క్షీరపాకమ్ ఓదనం వరాహమ్ ఇన్ద్ర ఏముషమ్ || 8-077-10
తువిక్షం తే సుకృతం సూమయం ధనుః సాధుర్ బున్దో హిరణ్యయః |
ఉభా తే బాహూ రణ్యా సుసంస్కృత ఋదూపే చిద్ ఋదూవృధా || 8-077-11
