ఇమం ను మాయినం హువ ఇన్ద్రమ్ ఈశానమ్ ఓజసా |
మరుత్వన్తం న వృఞ్జసే || 8-076-01
అయమ్ ఇన్ద్రో మరుత్సఖా వి వృత్రస్యాభినచ్ ఛిరః |
వజ్రేణ శతపర్వణా || 8-076-02
వావృధానో మరుత్సఖేన్ద్రో వి వృత్రమ్ ఐరయత్ |
సృజన్ సముద్రియా అపః || 8-076-03
అయం హ యేన వా ఇదం స్వర్ మరుత్వతా జితమ్ |
ఇన్ద్రేణ సోమపీతయే || 8-076-04
మరుత్వన్తమ్ ఋజీషిణమ్ ఓజస్వన్తం విరప్శినమ్ |
ఇన్ద్రం గీర్భిర్ హవామహే || 8-076-05
ఇన్ద్రమ్ ప్రత్నేన మన్మనా మరుత్వన్తం హవామహే |
అస్య సోమస్య పీతయే || 8-076-06
మరుత్వాఇన్ద్ర మీఢ్వః పిబా సోమం శతక్రతో |
అస్మిన్ యజ్ఞే పురుష్టుత || 8-076-07
తుభ్యేద్ ఇన్ద్ర మరుత్వతే సుతాః సోమాసో అద్రివః |
హృదా హూయన్త ఉక్థినః || 8-076-08
పిబేద్ ఇన్ద్ర మరుత్సఖా సుతం సోమం దివిష్టిషు |
వజ్రం శిశాన ఓజసా || 8-076-09
ఉత్తిష్ఠన్న్ ఓజసా సహ పీత్వీ శిప్రే అవేపయః |
సోమమ్ ఇన్ద్ర చమూ సుతమ్ || 8-076-10
అను త్వా రోదసీ ఉభే క్రక్షమాణమ్ అకృపేతామ్ |
ఇన్ద్ర యద్ దస్యుహాభవః || 8-076-11
వాచమ్ అష్టాపదీమ్ అహం నవస్రక్తిమ్ ఋతస్పృశమ్ |
ఇన్ద్రాత్ పరి తన్వమ్ మమే || 8-076-12
