త్వం నో అగ్నే మహోభిః పాహి విశ్వస్యా అరాతేః |
ఉత ద్విషో మర్త్యస్య || 8-071-01
నహి మన్యుః పౌరుషేయ ఈశే హి వః ప్రియజాత |
త్వమ్ ఇద్ అసి క్షపావాన్ || 8-071-02
స నో విశ్వేభిర్ దేవేభిర్ ఊర్జో నపాద్ భద్రశోచే |
రయిం దేహి విశ్వవారమ్ || 8-071-03
న తమ్ అగ్నే అరాతయో మర్తం యువన్త రాయః |
యం త్రాయసే దాశ్వాంసమ్ || 8-071-04
యం త్వం విప్ర మేధసాతావ్ అగ్నే హినోషి ధనాయ |
స తవోతీ గోషు గన్తా || 8-071-05
త్వం రయిమ్ పురువీరమ్ అగ్నే దాశుషే మర్తాయ |
ప్ర ణో నయ వస్యో అచ్ఛ || 8-071-06
ఉరుష్యా ణో మా పరా దా అఘాయతే జాతవేదః |
దురాధ్యే మర్తాయ || 8-071-07
అగ్నే మాకిష్ టే దేవస్య రాతిమ్ అదేవో యుయోత |
త్వమ్ ఈశిషే వసూనామ్ || 8-071-08
స నో వస్వ ఉప మాస్య్ ఊర్జో నపాన్ మాహినస్య |
సఖే వసో జరితృభ్యః || 8-071-09
అచ్ఛా నః శీరశోచిషం గిరో యన్తు దర్శతమ్ |
అచ్ఛా యజ్ఞాసో నమసా పురూవసుమ్ పురుప్రశస్తమ్ ఊతయే || 8-071-10
అగ్నిం సూనుం సహసో జాతవేదసం దానాయ వార్యాణామ్ |
ద్వితా యో భూద్ అమృతో మర్త్యేష్వ్ ఆ హోతా మన్ద్రతమో విశి || 8-071-11
అగ్నిం వో దేవయజ్యయాగ్నిమ్ ప్రయత్య్ అధ్వరే |
అగ్నిం ధీషు ప్రథమమ్ అగ్నిమ్ అర్వత్య్ అగ్నిం క్షైత్రాయ సాధసే || 8-071-12
అగ్నిర్ ఇషాం సఖ్యే దదాతు న ఈశే యో వార్యాణామ్ |
అగ్నిం తోకే తనయే శశ్వద్ ఈమహే వసుం సన్తం తనూపామ్ || 8-071-13
అగ్నిమ్ ఈళిష్వావసే గాథాభిః శీరశోచిషమ్ |
అగ్నిం రాయే పురుమీళ్హ శ్రుతం నరో ऽగ్నిం సుదీతయే ఛర్దిః || 8-071-14
అగ్నిం ద్వేషో యోతవై నో గృణీమస్య్ అగ్నిం శం యోశ్ చ దాతవే |
విశ్వాసు విక్ష్వ్ అవితేవ హవ్యో భువద్ వస్తుర్ ఋషూణామ్ || 8-071-15
