యో రాజా చర్షణీనాం యాతా రథేభిర్ అధ్రిగుః |
విశ్వాసాం తరుతా పృతనానాం జ్యేష్ఠో యో వృత్రహా గృణే || 8-070-01
ఇన్ద్రం తం శుమ్భ పురుహన్మన్న్ అవసే యస్య ద్వితా విధర్తరి |
హస్తాయ వజ్రః ప్రతి ధాయి దర్శతో మహో దివే న సూర్యః || 8-070-02
నకిష్ టం కర్మణా నశద్ యశ్ చకార సదావృధమ్ |
ఇన్ద్రం న యజ్ఞైర్ విశ్వగూర్తమ్ ఋభ్వసమ్ అధృష్టం ధృష్ణ్వోజసమ్ || 8-070-03
అషాళ్హమ్ ఉగ్రమ్ పృతనాసు సాసహిం యస్మిన్ మహీర్ ఉరుజ్రయః |
సం ధేనవో జాయమానే అనోనవుర్ ద్యావః క్షామో అనోనవుః || 8-070-04
యద్ ద్యావ ఇన్ద్ర తే శతం శతమ్ భూమీర్ ఉత స్యుః |
న త్వా వజ్రిన్ సహస్రం సూర్యా అను న జాతమ్ అష్ట రోదసీ || 8-070-05
ఆ పప్రాథ మహినా వృష్ణ్యా వృషన్ విశ్వా శవిష్ఠ శవసా |
అస్మాఅవ మఘవన్ గోమతి వ్రజే వజ్రిఞ్ చిత్రాభిర్ ఊతిభిః || 8-070-06
న సీమ్ అదేవ ఆపద్ ఇషం దీర్ఘాయో మర్త్యః |
ఏతగ్వా చిద్ య ఏతశా యుయోజతే హరీ ఇన్ద్రో యుయోజతే || 8-070-07
తం వో మహో మహాయ్యమ్ ఇన్ద్రం దానాయ సక్షణిమ్ |
యో గాధేషు య ఆరణేషు హవ్యో వాజేష్వ్ అస్తి హవ్యః || 8-070-08
ఉద్ ఊ షు ణో వసో మహే మృశస్వ శూర రాధసే |
ఉద్ ఊ షు మహ్యై మఘవన్ మఘత్తయ ఉద్ ఇన్ద్ర శ్రవసే మహే || 8-070-09
త్వం న ఇన్ద్ర ఋతయుస్ త్వానిదో ని తృమ్పసి |
మధ్యే వసిష్వ తువినృమ్ణోర్వోర్ ని దాసం శిశ్నథో హథైః || 8-070-10
అన్యవ్రతమ్ అమానుషమ్ అయజ్వానమ్ అదేవయుమ్ |
అవ స్వః సఖా దుధువీత పర్వతః సుఘ్నాయ దస్యుమ్ పర్వతః || 8-070-11
త్వం న ఇన్ద్రాసాం హస్తే శవిష్ఠ దావనే |
ధానానాం న సం గృభాయాస్మయుర్ ద్విః సం గృభాయాస్మయుః || 8-070-12
సఖాయః క్రతుమ్ ఇచ్ఛత కథా రాధామ శరస్య |
ఉపస్తుతిమ్ భోజః సూరిర్ యో అహ్రయః || 8-070-13
భూరిభిః సమహ ఋషిభిర్ బర్హిష్మద్భి స్తవిష్యసే |
యద్ ఇత్థమ్ ఏకమ్-ఏకమ్ ఇచ్ ఛర వత్సాన్ పరాదదః || 8-070-14
కర్ణగృహ్యా మఘవా శౌరదేవ్యో వత్సం నస్ త్రిభ్య ఆనయత్ |
అజాం సూరిర్ న ధాతవే || 8-070-15
