ప్ర యద్ వస్ త్రిష్టుభమ్ ఇషమ్ మరుతో విప్రో అక్షరత్ |
వి పర్వతేషు రాజథ || 8-007-01
యద్ అఙ్గ తవిషీయవో యామం శుభ్రా అచిధ్వమ్ |
ని పర్వతా అహాసత || 8-007-02
ఉద్ ఈరయన్త వాయుభిర్ వాశ్రాసః పృశ్నిమాతరః |
ధుక్షన్త పిప్యుషీమ్ ఇషమ్ || 8-007-03
వపన్తి మరుతో మిహమ్ ప్ర వేపయన్తి పర్వతాన్ |
యద్ యామం యాన్తి వాయుభిః || 8-007-04
ని యద్ యామాయ వో గిరిర్ ని సిన్ధవో విధర్మణే |
మహే శుష్మాయ యేమిరే || 8-007-05
యుష్మాఉ నక్తమ్ ఊతయే యుష్మాన్ దివా హవామహే |
యుష్మాన్ ప్రయత్య్ అధ్వరే || 8-007-06
ఉద్ ఉ త్యే అరుణప్సవశ్ చిత్రా యామేభిర్ ఈరతే |
వాశ్రా అధి ష్ణునా దివః || 8-007-07
సృజన్తి రశ్మిమ్ ఓజసా పన్థాం సూర్యాయ యాతవే |
తే భానుభిర్ వి తస్థిరే || 8-007-08
ఇమామ్ మే మరుతో గిరమ్ ఇమం స్తోమమ్ ఋభుక్షణః |
ఇమమ్ మే వనతా హవమ్ || 8-007-09
త్రీణి సరాంసి పృశ్నయో దుదుహ్రే వజ్రిణే మధు |
ఉత్సం కవన్ధమ్ ఉద్రిణమ్ || 8-007-10
మరుతో యద్ ధ వో దివః సుమ్నాయన్తో హవామహే |
ఆ తూ న ఉప గన్తన || 8-007-11
యూయం హి ష్ఠా సుదానవో రుద్రా ఋభుక్షణో దమే |
ఉత ప్రచేతసో మదే || 8-007-12
ఆ నో రయిమ్ మదచ్యుతమ్ పురుక్షుం విశ్వధాయసమ్ |
ఇయర్తా మరుతో దివః || 8-007-13
అధీవ యద్ గిరీణాం యామం శుభ్రా అచిధ్వమ్ |
సువానైర్ మన్దధ్వ ఇన్దుభిః || 8-007-14
ఏతావతశ్ చిద్ ఏషాం సుమ్నమ్ భిక్షేత మర్త్యః |
అదాభ్యస్య మన్మభిః || 8-007-15
యే ద్రప్సా ఇవ రోదసీ ధమన్త్య్ అను వృష్టిభిః |
ఉత్సం దుహన్తో అక్షితమ్ || 8-007-16
ఉద్ ఉ స్వానేభిర్ ఈరత ఉద్ రథైర్ ఉద్ ఉ వాయుభిః |
ఉత్ స్తోమైః పృశ్నిమాతరః || 8-007-17
యేనావ తుర్వశం యదుం యేన కణ్వం ధనస్పృతమ్ |
రాయే సు తస్య ధీమహి || 8-007-18
ఇమా ఉ వః సుదానవో ఘృతం న పిప్యుషీర్ ఇషః |
వర్ధాన్ కాణ్వస్య మన్మభిః || 8-007-19
క్వ నూనం సుదానవో మదథా వృక్తబర్హిషః |
బ్రహ్మా కో వః సపర్యతి || 8-007-20
నహి ష్మ యద్ ధ వః పురా స్తోమేభిర్ వృక్తబర్హిషః |
శర్ధాఋతస్య జిన్వథ || 8-007-21
సమ్ ఉ త్యే మహతీర్ అపః సం క్షోణీ సమ్ ఉ సూర్యమ్ |
సం వజ్రమ్ పర్వశో దధుః || 8-007-22
వి వృత్రమ్ పర్వశో యయుర్ వి పర్వతాఅరాజినః |
చక్రాణా వృష్ణి పౌంస్యమ్ || 8-007-23
అను త్రితస్య యుధ్యతః శుష్మమ్ ఆవన్న్ ఉత క్రతుమ్ |
అన్వ్ ఇన్ద్రం వృత్రతూర్యే || 8-007-24
విద్యుద్ధస్తా అభిద్యవః శిప్రాః శీర్షన్ హిరణ్యయీః |
శుభ్రా వ్య్ అఞ్జత శ్రియే || 8-007-25
ఉశనా యత్ పరావత ఉక్ష్ణో రన్ధ్రమ్ అయాతన |
ద్యౌర్ న చక్రదద్ భియా || 8-007-26
ఆ నో మఖస్య దావనే ऽశ్వైర్ హిరణ్యపాణిభిః |
దేవాస ఉప గన్తన || 8-007-27
యద్ ఏషామ్ పృషతీ రథే ప్రష్టిర్ వహతి రోహితః |
యాన్తి శుభ్రా రిణన్న్ అపః || 8-007-28
సుషోమే శర్యణావత్య్ ఆర్జీకే పస్త్యావతి |
యయుర్ నిచక్రయా నరః || 8-007-29
కదా గచ్ఛాథ మరుత ఇత్థా విప్రం హవమానమ్ |
మార్డీకేభిర్ నాధమానమ్ || 8-007-30
కద్ ధ నూనం కధప్రియో యద్ ఇన్ద్రమ్ అజహాతన |
కో వః సఖిత్వ ఓహతే || 8-007-31
సహో షు ణో వజ్రహస్తైః కణ్వాసో అగ్నిమ్ మరుద్భిః |
స్తుషే హిరణ్యవాశీభిః || 8-007-32
ఓ షు వృష్ణః ప్రయజ్యూన్ ఆ నవ్యసే సువితాయ |
వవృత్యాం చిత్రవాజాన్ || 8-007-33
గిరయశ్ చిన్ ని జిహతే పర్శానాసో మన్యమానాః |
పర్వతాశ్ చిన్ ని యేమిరే || 8-007-34
ఆక్ష్ణయావానో వహన్త్య్ అన్తరిక్షేణ పతతః |
ధాతార స్తువతే వయః || 8-007-35
అగ్నిర్ హి జాని పూర్వ్యశ్ ఛన్దో న సూరో అర్చిషా |
తే భానుభిర్ వి తస్థిరే || 8-007-36
