యద్ ఇన్ద్ర ప్రాగ్ అపాగ్ ఉదఙ్ న్యగ్ వా హూయసే నృభిః |
ఆ యాహి తూయమ్ ఆశుభిః || 8-065-01
యద్ వా ప్రస్రవణే దివో మాదయాసే స్వర్ణరే |
యద్ వా సముద్రే అన్ధసః || 8-065-02
ఆ త్వా గీర్భిర్ మహామ్ ఉరుం హువే గామ్ ఇవ భోజసే |
ఇన్ద్ర సోమస్య పీతయే || 8-065-03
ఆ త ఇన్ద్ర మహిమానం హరయో దేవ తే మహః |
రథే వహన్తు బిభ్రతః || 8-065-04
ఇన్ద్ర గృణీష ఉ స్తుషే మహాఉగ్ర ఈశానకృత్ |
ఏహి నః సుతమ్ పిబ || 8-065-05
సుతావన్తస్ త్వా వయమ్ ప్రయస్వన్తో హవామహే |
ఇదం నో బర్హిర్ ఆసదే || 8-065-06
యచ్ చిద్ ధి శశ్వతామ్ అసీన్ద్ర సాధారణస్ త్వమ్ |
తం త్వా వయం హవామహే || 8-065-07
ఇదం తే సోమ్యమ్ మధ్వ్ అధుక్షన్న్ అద్రిభిర్ నరః |
జుషాణ ఇన్ద్ర తత్ పిబ || 8-065-08
విశ్వాఅర్యో విపశ్చితో ऽతి ఖ్యస్ తూయమ్ ఆ గహి |
అస్మే ధేహి శ్రవో బృహత్ || 8-065-09
దాతా మే పృషతీనాం రాజా హిరణ్యవీనామ్ |
మా దేవా మఘవా రిషత్ || 8-065-10
సహస్రే పృషతీనామ్ అధి శ్చన్ద్రమ్ బృహత్ పృథు |
శుక్రం హిరణ్యమ్ ఆ దదే || 8-065-11
నపాతో దుర్గహస్య మే సహస్రేణ సురాధసః |
శ్రవో దేవేష్వ్ అక్రత || 8-065-12
