ఋగ్వేదము - మండలము 8 - సూక్తము 60

వికీసోర్స్ నుండి
Jump to navigation Jump to search
ఋగ్వేదము (ఋగ్వేదము - మండలము 8 - సూక్తము 60)
దేవత : , చంధస్సు :


ఋగ్వేదము
మండలములు
మండలము 1
మండలము 2
మండలము 3
మండలము 4
మండలము 5
మండలము 6
మండలము 7
మండలము 8
మండలము 9
మండలము 10

  అగ్న ఆ యాహ్య్ అగ్నిభిర్ హోతారం త్వా వృణీమహే |
  ఆ త్వామ్ అనక్తు ప్రయతా హవిష్మతీ యజిష్ఠమ్ బర్హిర్ ఆసదే || 8-060-01

  అచ్ఛా హి త్వా సహసః సూనో అఙ్గిరః స్రుచశ్ చరన్త్య్ అధ్వరే |
  ఊర్జో నపాతం ఘృతకేశమ్ ఈమహే ऽగ్నిం యజ్ఞేషు పూర్వ్యమ్ || 8-060-02

  అగ్నే కవిర్ వేధా అసి హోతా పావక యక్ష్యః |
  మన్ద్రో యజిష్ఠో అధ్వరేష్వ్ ఈడ్యో విప్రేభిః శుక్ర మన్మభిః || 8-060-03

  అద్రోఘమ్ ఆ వహోశతో యవిష్ఠ్య దేవాఅజస్ర వీతయే |
  అభి ప్రయాంసి సుధితా వసో గహి మన్దస్వ ధీతిభిర్ హితః || 8-060-04

  త్వమ్ ఇత్ సప్రథా అస్య్ అగ్నే త్రాతర్ ఋతస్ కవిః |
  త్వాం విప్రాసః సమిధాన దీదివ ఆ వివాసన్తి వేధసః || 8-060-05

  శోచా శోచిష్ఠ దీదిహి విశే మయో రాస్వ స్తోత్రే మహాఅసి |
  దేవానాం శర్మన్ మమ సన్తు సూరయః శత్రూషాహః స్వగ్నయః || 8-060-06

  యథా చిద్ వృద్ధమ్ అతసమ్ అగ్నే సంజూర్వసి క్షమి |
  ఏవా దహ మిత్రమహో యో అస్మధ్రుగ్ దుర్మన్మా కశ్ చ వేనతి || 8-060-07

  మా నో మర్తాయ రిపవే రక్షస్వినే మాఘశంసాయ రీరధః |
  అస్రేధద్భిస్ తరణిభిర్ యవిష్ఠ్య శివేభిః పాహి పాయుభిః || 8-060-08

  పాహి నో అగ్న ఏకయా పాహ్య్ ఉత ద్వితీయయా |
  పాహి గీర్భిస్ తిసృభిర్ ఊర్జామ్ పతే పాహి చతసృభిర్ వసో || 8-060-09

  పాహి విశ్వస్మాద్ రక్షసో అరావ్ణః ప్ర స్మ వాజేషు నో ऽవ |
  త్వామ్ ఇద్ ధి నేదిష్ఠం దేవతాతయ ఆపిం నక్షామహే వృధే || 8-060-10

  ఆ నో అగ్నే వయోవృధం రయిమ్ పావక శంస్యమ్ |
  రాస్వా చ న ఉపమాతే పురుస్పృహం సునీతీ స్వయశస్తరమ్ || 8-060-11

  యేన వంసామ పృతనాసు శర్ధతస్ తరన్తో అర్య ఆదిశః |
  స త్వం నో వర్ధ ప్రయసా శచీవసో జిన్వా ధియో వసువిదః || 8-060-12

  శిశానో వృషభో యథాగ్నిః శృఙ్గే దవిధ్వత్ |
  తిగ్మా అస్య హనవో న ప్రతిధృషే సుజమ్భః సహసో యహుః || 8-060-13

  నహి తే అగ్నే వృషభ ప్రతిధృషే జమ్భాసో యద్ వితిష్ఠసే |
  స త్వం నో హోతః సుహుతం హవిష్ కృధి వంస్వా నో వార్యా పురు || 8-060-14

  శేషే వనేషు మాత్రోః సం త్వా మర్తాస ఇన్ధతే |
  అతన్ద్రో హవ్యా వహసి హవిష్కృత ఆద్ ఇద్ దేవేషు రాజసి || 8-060-15

  సప్త హోతారస్ తమ్ ఇద్ ఈళతే త్వాగ్నే సుత్యజమ్ అహ్రయమ్ |
  భినత్స్య్ అద్రిం తపసా వి శోచిషా ప్రాగ్నే తిష్ఠ జనాఅతి || 8-060-16

  అగ్నిమ్-అగ్నిం వో అధ్రిగుం హువేమ వృక్తబర్హిషః |
  అగ్నిం హితప్రయసః శశ్వతీష్వ్ ఆ హోతారం చర్షణీనామ్ || 8-060-17

  కేతేన శర్మన్ సచతే సుషామణ్య్ అగ్నే తుభ్యం చికిత్వనా |
  ఇషణ్యయా నః పురురూపమ్ ఆ భర వాజం నేదిష్ఠమ్ ఊతయే || 8-060-18

  అగ్నే జరితర్ విశ్పతిస్ తేపానో దేవ రక్షసః |
  అప్రోషివాన్ గృహపతిర్ మహాఅసి దివస్ పాయుర్ దురోణయుః || 8-060-19

  మా నో రక్ష ఆ వేశీద్ ఆఘృణీవసో మా యాతుర్ యాతుమావతామ్ |
  పరోగవ్యూత్య్ అనిరామ్ అప క్షుధమ్ అగ్నే సేధ రక్షస్వినః || 8-060-20