ఏతత్ త ఇన్ద్ర వీర్యం గీర్భిర్ గృణన్తి కారవః |
తే స్తోభన్త ఊర్జమ్ ఆవన్ ఘృతశ్చుతమ్ పౌరాసో నక్షన్ ధీతిభిః || 8-054-01
నక్షన్త ఇన్ద్రమ్ అవసే సుకృత్యయా యేషాం సుతేషు మన్దసే |
యథా సంవర్తే అమదో యథా కృశ ఏవాస్మే ఇన్ద్ర మత్స్వ || 8-054-02
ఆ నో విశ్వే సజోషసో దేవాసో గన్తనోప నః |
వసవో రుద్రా అవసే న ఆ గమఞ్ ఛృణ్వన్తు మరుతో హవమ్ || 8-054-03
పూషా విష్ణుర్ హవనమ్ మే సరస్వత్య్ అవన్తు సప్త సిన్ధవః |
ఆపో వాతః పర్వతాసో వనస్పతిః శృణోతు పృథివీ హవమ్ || 8-054-04
యద్ ఇన్ద్ర రాధో అస్తి తే మాఘోనమ్ మఘవత్తమ |
తేన నో బోధి సధమాద్యో వృధే భగో దానాయ వృత్రహన్ || 8-054-05
ఆజిపతే నృపతే త్వమ్ ఇద్ ధి నో వాజ ఆ వక్షి సుక్రతో |
వీతీ హోత్రాభిర్ ఉత దేవవీతిభిః ససవాంసో వి శృణ్విరే || 8-054-06
సన్తి హ్య్ అర్య ఆశిష ఇన్ద్ర ఆయుర్ జనానామ్ |
అస్మాన్ నక్షస్వ మఘవన్న్ ఉపావసే ధుక్షస్వ పిప్యుషీమ్ ఇషమ్ || 8-054-07
వయం త ఇన్ద్ర స్తోమేభిర్ విధేమ త్వమ్ అస్మాకం శతక్రతో |
మహి స్థూరం శశయం రాధో అహ్రయమ్ ప్రస్కణ్వాయ ని తోశయ || 8-054-08
