ప్రేదమ్ బ్రహ్మ వృత్రతూర్యేష్వ్ ఆవిథ ప్ర సున్వతః శచీపత|
ఇన్ద్ర విశ్వాభిర్ ఊతిభిః |
మాధ్యందినస్య సవనస్య వృత్రహన్న్ అనేద్య పిబా సోమస్య వజ్రివః || 8-037-01
సేహాన ఉగ్ర పృతనా అభి ద్రుహః శచీపత ఇన్ద్ర విశ్వాభిర్ ఊతిభిః |
మాధ్యందినస్య సవనస్య వృత్రహన్న్ అనేద్య పిబా సోమస్య వజ్రివః || 8-037-02
ఏకరాళ్ అస్య భువనస్య రాజసి శచీపత ఇన్ద్ర విశ్వాభిర్ ఊతిభిః |
మాధ్యందినస్య సవనస్య వృత్రహన్న్ అనేద్య పిబా సోమస్య వజ్రివః || 8-037-03
సస్థావానా యవయసి త్వమ్ ఏక ఇచ్ ఛచీపత ఇన్ద్ర విశ్వాభిర్ ఊతిభిః |
మాధ్యందినస్య సవనస్య వృత్రహన్న్ అనేద్య పిబా సోమస్య వజ్రివః || 8-037-04
క్షేమస్య చ ప్రయుజశ్ చ త్వమ్ ఈశిషే శచీపత ఇన్ద్ర విశ్వాభిర్ ఊతిభిః |
మాధ్యందినస్య సవనస్య వృత్రహన్న్ అనేద్య పిబా సోమస్య వజ్రివః || 8-037-05
క్షత్రాయ త్వమ్ అవసి న త్వమ్ ఆవిథ శచీపత ఇన్ద్ర విశ్వాభిర్ ఊతిభిః |
మాధ్యందినస్య సవనస్య వృత్రహన్న్ అనేద్య పిబా సోమస్య వజ్రివః || 8-037-06
శ్యావాశ్వస్య రేభతస్ తథా శృణు యథాశృణోర్ అత్రేః కర్మాణి కృణ్వతః |
ప్ర త్రసదస్యుమ్ ఆవిథ త్వమ్ ఏక ఇన్ నృషాహ్య ఇన్ద్ర క్షత్రాణి వర్ధయన్ || 8-037-07
