ఇదం వసో సుతమ్ అన్ధః పిబా సుపూర్ణమ్ ఉదరమ్ |
అనాభయిన్ రరిమా తే || 8-002-01
నృభిర్ ధూతః సుతో అశ్నైర్ అవ్యో వారైః పరిపూతః |
అశ్వో న నిక్తో నదీషు || 8-002-02
తం తే యవం యథా గోభిః స్వాదుమ్ అకర్మ శ్రీణన్తః |
ఇన్ద్ర త్వాస్మిన్ సధమాదే || 8-002-03
ఇన్ద్ర ఇత్ సోమపా ఏక ఇన్ద్రః సుతపా విశ్వాయుః |
అన్తర్ దేవాన్ మర్త్యాంశ్ చ || 8-002-04
న యం శుక్రో న దురాశీర్ న తృప్రా ఉరువ్యచసమ్ |
అపస్పృణ్వతే సుహార్దమ్ || 8-002-05
గోభిర్ యద్ ఈమ్ అన్యే అస్మన్ మృగం న వ్రా మృగయన్తే |
అభిత్సరన్తి ధేనుభిః || 8-002-06
త్రయ ఇన్ద్రస్య సోమాః సుతాసః సన్తు దేవస్య |
స్వే క్షయే సుతపావ్నః || 8-002-07
త్రయః కోశాస శ్చోతన్తి తిస్రశ్ చమ్వః సుపూర్ణాః |
సమానే అధి భార్మన్ || 8-002-08
శుచిర్ అసి పురునిష్ఠాః క్షీరైర్ మధ్యత ఆశీర్తః |
దధ్నా మన్దిష్ఠః శూరస్య || 8-002-09
ఇమే త ఇన్ద్ర సోమాస్ తీవ్రా అస్మే సుతాసః |
శుక్రా ఆశిరం యాచన్తే || 8-002-10
తాఆశిరమ్ పురోళాశమ్ ఇన్ద్రేమం సోమం శ్రీణీహి |
రేవన్తం హి త్వా శృణోమి || 8-002-11
హృత్సు పీతాసో యుధ్యన్తే దుర్మదాసో న సురాయామ్ |
ఊధర్ న నగ్నా జరన్తే || 8-002-12
రేవాఇద్ రేవత స్తోతా స్యాత్ త్వావతో మఘోనః |
ప్రేద్ ఉ హరివః శ్రుతస్య || 8-002-13
ఉక్థం చన శస్యమానమ్ అగోర్ అరిర్ ఆ చికేత |
న గాయత్రం గీయమానమ్ || 8-002-14
మా న ఇన్ద్ర పీయత్నవే మా శర్ధతే పరా దాః |
శిక్షా శచీవః శచీభిః || 8-002-15
వయమ్ ఉ త్వా తదిదర్థా ఇన్ద్ర త్వాయన్తః సఖాయః |
కణ్వా ఉక్థేభిర్ జరన్తే || 8-002-16
న ఘేమ్ అన్యద్ ఆ పపన వజ్రిన్న్ అపసో నవిష్టౌ |
తవేద్ ఉ స్తోమం చికేత || 8-002-17
ఇచ్ఛన్తి దేవాః సున్వన్తం న స్వప్నాయ స్పృహయన్తి |
యన్తి ప్రమాదమ్ అతన్ద్రాః || 8-002-18
ఓ షు ప్ర యాహి వాజేభిర్ మా హృణీథా అభ్య్ అస్మాన్ |
మహాఇవ యువజానిః || 8-002-19
మో ష్వ్ అద్య దుర్హణావాన్ సాయం కరద్ ఆరే అస్మత్ |
అశ్రీర ఇవ జామాతా || 8-002-20
విద్మా హ్య్ అస్య వీరస్య భూరిదావరీం సుమతిమ్ |
త్రిషు జాతస్య మనాంసి || 8-002-21
ఆ తూ షిఞ్చ కణ్వమన్తం న ఘా విద్మ శవసానాత్ |
యశస్తరం శతమూతేః || 8-002-22
జ్యేష్ఠేన సోతర్ ఇన్ద్రాయ సోమం వీరాయ శక్రాయ |
భరా పిబన్ నర్యాయ || 8-002-23
యో వేదిష్ఠో అవ్యథిష్వ్ అశ్వావన్తం జరితృభ్యః |
వాజం స్తోతృభ్యో గోమన్తమ్ || 8-002-24
పన్యమ్-పన్యమ్ ఇత్ సోతార ఆ ధావత మద్యాయ |
సోమం వీరాయ శూరాయ || 8-002-25
పాతా వృత్రహా సుతమ్ ఆ ఘా గమన్ నారే అస్మత్ |
ని యమతే శతమూతిః || 8-002-26
ఏహ హరీ బ్రహ్మయుజా శగ్మా వక్షతః సఖాయమ్ |
గీర్భిః శ్రుతం గిర్వణసమ్ || 8-002-27
స్వాదవః సోమా ఆ యాహి శ్రీతాః సోమా ఆ యాహి |
శిప్రిన్న్ ఋషీవః శచీవో నాయమ్ అచ్ఛా సధమాదమ్ || 8-002-28
స్తుతశ్ చ యాస్ త్వా వర్ధన్తి మహే రాధసే నృమ్ణాయ |
ఇన్ద్ర కారిణం వృధన్తః || 8-002-29
గిరశ్ చ యాస్ తే గిర్వాహ ఉక్థా చ తుభ్యం తాని |
సత్రా దధిరే శవాంసి || 8-002-30
ఏవేద్ ఏష తువికూర్మిర్ వాజాఏకో వజ్రహస్తః |
సనాద్ అమృక్తో దయతే || 8-002-31
హన్తా వృత్రం దక్షిణేనేన్ద్రః పురూ పురుహూతః |
మహాన్ మహీభిః శచీభిః || 8-002-32
యస్మిన్ విశ్వాశ్ చర్షణయ ఉత చ్యౌత్నా జ్రయాంసి చ |
అను ఘేన్ మన్దీ మఘోనః || 8-002-33
ఏష ఏతాని చకారేన్ద్రో విశ్వా యో ऽతి శృణ్వే |
వాజదావా మఘోనామ్ || 8-002-34
ప్రభర్తా రథం గవ్యన్తమ్ అపాకాచ్ చిద్ యమ్ అవతి |
ఇనో వసు స హి వోళ్హా || 8-002-35
సనితా విప్రో అర్వద్భిర్ హన్తా వృత్రం నృభిః శూరః |
సత్యో ऽవితా విధన్తమ్ || 8-002-36
యజధ్వైనమ్ ప్రియమేధా ఇన్ద్రం సత్రాచా మనసా |
యో భూత్ సోమైః సత్యమద్వా || 8-002-37
గాథశ్రవసం సత్పతిం శ్రవస్కామమ్ పురుత్మానమ్ |
కణ్వాసో గాత వాజినమ్ || 8-002-38
య ఋతే చిద్ గాస్ పదేభ్యో దాత్ సఖా నృభ్యః శచీవాన్ |
యే అస్మిన్ కామమ్ అశ్రియన్ || 8-002-39
ఇత్థా ధీవన్తమ్ అద్రివః కాణ్వమ్ మేధ్యాతిథిమ్ |
మేషో భూతో ऽభి యన్న్ అయః || 8-002-40
శిక్షా విభిన్దో అస్మై చత్వార్య్ అయుతా దదత్ |
అష్టా పరః సహస్రా || 8-002-41
ఉత సు త్యే పయోవృధా మాకీ రణస్య నప్త్యా |
జనిత్వనాయ మామహే || 8-002-42
