యద్ ఇన్ద్రాహం యథా త్వమ్ ఈశీయ వస్వ ఏక ఇత్ |
స్తోతా మే గోషఖా స్యాత్ || 8-014-01
శిక్షేయమ్ అస్మై దిత్సేయం శచీపతే మనీషిణే |
యద్ అహం గోపతిః స్యామ్ || 8-014-02
ధేనుష్ ట ఇన్ద్ర సూనృతా యజమానాయ సున్వతే |
గామ్ అశ్వమ్ పిప్యుషీ దుహే || 8-014-03
న తే వర్తాస్తి రాధస ఇన్ద్ర దేవో న మర్త్యః |
యద్ దిత్ససి స్తుతో మఘమ్ || 8-014-04
యజ్ఞ ఇన్ద్రమ్ అవర్ధయద్ యద్ భూమిం వ్య్ అవర్తయత్ |
చక్రాణ ఓపశం దివి || 8-014-05
వావృధానస్య తే వయం విశ్వా ధనాని జిగ్యుషః |
ఊతిమ్ ఇన్ద్రా వృణీమహే || 8-014-06
వ్య్ అన్తరిక్షమ్ అతిరన్ మదే సోమస్య రోచనా |
ఇన్ద్రో యద్ అభినద్ వలమ్ || 8-014-07
ఉద్ గా ఆజద్ అఙ్గిరోభ్య ఆవిష్ కృణ్వన్ గుహా సతీః |
అర్వాఞ్చం నునుదే వలమ్ || 8-014-08
ఇన్ద్రేణ రోచనా దివో దృళ్హాని దృంహితాని చ |
స్థిరాణి న పరాణుదే || 8-014-09
అపామ్ ఊర్మిర్ మదన్న్ ఇవ స్తోమ ఇన్ద్రాజిరాయతే |
వి తే మదా అరాజిషుః || 8-014-10
త్వం హి స్తోమవర్ధన ఇన్ద్రాస్య్ ఉక్థవర్ధనః |
స్తోతౄణామ్ ఉత భద్రకృత్ || 8-014-11
ఇన్ద్రమ్ ఇత్ కేశినా హరీ సోమపేయాయ వక్షతః |
ఉప యజ్ఞం సురాధసమ్ || 8-014-12
అపామ్ ఫేనేన నముచేః శిర ఇన్ద్రోద్ అవర్తయః |
విశ్వా యద్ అజయ స్పృధః || 8-014-13
మాయాభిర్ ఉత్సిసృప్సత ఇన్ద్ర ద్యామ్ ఆరురుక్షతః |
అవ దస్యూఅధూనుథాః || 8-014-14
అసున్వామ్ ఇన్ద్ర సంసదం విషూచీం వ్య్ అనాశయః |
సోమపా ఉత్తరో భవన్ || 8-014-15
