ఇయం వామ్ అస్య మన్మన ఇన్ద్రాగ్నీ పూర్వ్యస్తుతిః |
అభ్రాద్ వృష్టిర్ ఇవాజని || 7-094-01
శృణుతం జరితుర్ హవమ్ ఇన్ద్రాగ్నీ వనతం గిరః |
ఈశానా పిప్యతం ధియః || 7-094-02
మా పాపత్వాయ నో నరేన్ద్రాగ్నీ మాభిశస్తయే |
మా నో రీరధతం నిదే || 7-094-03
ఇన్ద్రే అగ్నా నమో బృహత్ సువృక్తిమ్ ఏరయామహే |
ధియా ధేనా అవస్యవః || 7-094-04
తా హి శశ్వన్త ఈళత ఇత్థా విప్రాస ఊతయే |
సబాధో వాజసాతయే || 7-094-05
తా వాం గీర్భిర్ విపన్యవః ప్రయస్వన్తో హవామహే |
మేధసాతా సనిష్యవః || 7-094-06
ఇన్ద్రాగ్నీ అవసా గతమ్ అస్మభ్యం చర్షణీసహా |
మా నో దుఃశంస ఈశత || 7-094-07
మా కస్య నో అరరుషో ధూర్తిః ప్రణఙ్ మర్త్యస్య |
ఇన్ద్రాగ్నీ శర్మ యచ్ఛతమ్ || 7-094-08
గోమద్ ధిరణ్యవద్ వసు యద్ వామ్ అశ్వావద్ ఈమహే |
ఇన్ద్రాగ్నీ తద్ వనేమహి || 7-094-09
యత్ సోమ ఆ సుతే నర ఇన్ద్రాగ్నీ అజోహవుః |
సప్తీవన్తా సపర్యవః || 7-094-10
ఉక్థేభిర్ వృత్రహన్తమా యా మన్దానా చిద్ ఆ గిరా |
ఆఙ్గూషైర్ ఆవివాసతః || 7-094-11
తావ్ ఇద్ దుఃశంసమ్ మర్త్యం దుర్విద్వాంసం రక్షస్వినమ్ |
ఆభోగం హన్మనా హతమ్ ఉదధిం హన్మనా హతమ్ || 7-094-12
