శుచిం ను స్తోమం నవజాతమ్ అద్యేన్ద్రాగ్నీ వృత్రహణా జుషేథామ్ |
ఉభా హి వాం సుహవా జోహవీమి తా వాజం సద్య ఉశతే ధేష్ఠా || 7-093-01
తా సానసీ శవసానా హి భూతం సాకంవృధా శవసా శూశువాంసా |
క్షయన్తౌ రాయో యవసస్య భూరేః పృఙ్క్తం వాజస్య స్థవిరస్య ఘృష్వేః || 7-093-02
ఉపో హ యద్ విదథం వాజినో గుర్ ధీభిర్ విప్రాః ప్రమతిమ్ ఇచ్ఛమానాః |
అర్వన్తో న కాష్ఠాం నక్షమాణా ఇన్ద్రాగ్నీ జోహువతో నరస్ తే || 7-093-03
గీర్భిర్ విప్రః ప్రమతిమ్ ఇచ్ఛమాన ఈట్టే రయిం యశసమ్ పూర్వభాజమ్ |
ఇన్ద్రాగ్నీ వృత్రహణా సువజ్రా ప్ర నో నవ్యేభిస్ తిరతం దేష్ణైః || 7-093-04
సం యన్ మహీ మిథతీ స్పర్ధమానే తనూరుచా శూరసాతా యతైతే |
అదేవయుం విదథే దేవయుభిః సత్రా హతం సోమసుతా జనేన || 7-093-05
ఇమామ్ ఉ షు సోమసుతిమ్ ఉప న ఏన్ద్రాగ్నీ సౌమనసాయ యాతమ్ |
నూ చిద్ ధి పరిమమ్నాథే అస్మాన్ ఆ వాం శశ్వద్భిర్ వవృతీయ వాజైః || 7-093-06
సో అగ్న ఏనా నమసా సమిద్ధో ऽచ్ఛా మిత్రం వరుణమ్ ఇన్ద్రం వోచేః |
యత్ సీమ్ ఆగశ్ చకృమా తత్ సు మృళ తద్ అర్యమాదితిః శిశ్రథన్తు || 7-093-07
ఏతా అగ్న ఆశుషాణాస ఇష్టీర్ యువోః సచాభ్య్ అశ్యామ వాజాన్ |
మేన్ద్రో నో విష్ణుర్ మరుతః పరి ఖ్యన్ యూయమ్ పాత స్వస్తిభిః సదా నః || 7-093-08
