ప్ర వీరయా శుచయో దద్రిరే వామ్ అధ్వర్యుభిర్ మధుమన్తః సుతాసః |
వహ వాయో నియుతో యాహ్య్ అచ్ఛా పిబా సుతస్యాన్ధసో మదాయ || 7-090-01
ఈశానాయ ప్రహుతిం యస్ త ఆనట్ ఛుచిం సోమం శుచిపాస్ తుభ్యం వాయో |
కృణోషి తమ్ మర్త్యేషు ప్రశస్తం జాతో-జాతో జాయతే వాజ్య్ అస్య || 7-090-02
రాయే ను యం జజ్ఞతూ రోదసీమే రాయే దేవీ ధిషణా ధాతి దేవమ్ |
అధ వాయుం నియుతః సశ్చత స్వా ఉత శ్వేతం వసుధితిం నిరేకే || 7-090-03
ఉచ్ఛన్న్ ఉషసః సుదినా అరిప్రా ఉరు జ్యోతిర్ వివిదుర్ దీధ్యానాః |
గవ్యం చిద్ ఊర్వమ్ ఉశిజో వి వవ్రుస్ తేషామ్ అను ప్రదివః సస్రుర్ ఆపః || 7-090-04
తే సత్యేన మనసా దీధ్యానాః స్వేన యుక్తాసః క్రతునా వహన్తి |
ఇన్ద్రవాయూ వీరవాహం రథం వామ్ ఈశానయోర్ అభి పృక్షః సచన్తే || 7-090-05
ఈశానాసో యే దధతే స్వర్ ణో గోభిర్ అశ్వేభిర్ వసుభిర్ హిరణ్యైః |
ఇన్ద్రవాయూ సూరయో విశ్వమ్ ఆయుర్ అర్వద్భిర్ వీరైః పృతనాసు సహ్యుః || 7-090-06
అర్వన్తో న శ్రవసో భిక్షమాణా ఇన్ద్రవాయూ సుష్టుతిభిర్ వసిష్ఠాః |
వాజయన్తః స్వ్ అవసే హువేమ యూయమ్ పాత స్వస్తిభిః సదా నః || 7-090-07
