ఆ శుభ్రా యాతమ్ అశ్వినా స్వశ్వా గిరో దస్రా జుజుషాణా యువాకోః |
హవ్యాని చ ప్రతిభృతా వీతం నః || 7-068-01
ప్ర వామ్ అన్ధాంసి మద్యాన్య్ అస్థుర్ అరం గన్తం హవిషో వీతయే మే |
తిరో అర్యో హవనాని శ్రుతం నః || 7-068-02
ప్ర వాం రథో మనోజవా ఇయర్తి తిరో రజాంస్య్ అశ్వినా శతోతిః |
అస్మభ్యం సూర్యావసూ ఇయానః || 7-068-03
అయం హ యద్ వాం దేవయా ఉ అద్రిర్ ఊర్ధ్వో వివక్తి సోమసుద్ యువభ్యామ్ |
ఆ వల్గూ విప్రో వవృతీత హవ్యైః || 7-068-04
చిత్రం హ యద్ వామ్ భోజనం న్వ్ అస్తి న్య్ అత్రయే మహిష్వన్తం యుయోతమ్ |
యో వామ్ ఓమానం దధతే ప్రియః సన్ || 7-068-05
ఉత త్యద్ వాం జురతే అశ్వినా భూచ్ చ్యవానాయ ప్రతీత్యం హవిర్దే |
అధి యద్ వర్ప ఇతౌతి ధత్థః || 7-068-06
ఉత త్యమ్ భుజ్యుమ్ అశ్వినా సఖాయో మధ్యే జహుర్ దురేవాసః సముద్రే |
నిర్ ఈమ్ పర్షద్ అరావా యో యువాకుః || 7-068-07
వృకాయ చిజ్ జసమానాయ శక్తమ్ ఉత శ్రుతం శయవే హూయమానా |
యావ్ అఘ్న్యామ్ అపిన్వతమ్ అపో న స్తర్యం చిచ్ ఛక్త్య్ అశ్వినా శచీభిః || 7-068-08
ఏష స్య కారుర్ జరతే సూక్తైర్ అగ్రే బుధాన ఉషసాం సుమన్మా |
ఇషా తం వర్ధద్ అఘ్న్యా పయోభిర్ యూయమ్ పాత స్వస్తిభిః సదా నః || 7-068-09
