ఉత్ సూర్యో బృహద్ అర్చీంష్య్ అశ్రేత్ పురు విశ్వా జనిమ మానుషాణామ్ |
సమో దివా దదృశే రోచమానః క్రత్వా కృతః సుకృతః కర్తృభిర్ భూత్ || 7-062-01
స సూర్య ప్రతి పురో న ఉద్ గా ఏభి స్తోమేభిర్ ఏతశేభిర్ ఏవైః |
ప్ర నో మిత్రాయ వరుణాయ వోచో ऽనాగసో అర్యమ్ణే అగ్నయే చ || 7-062-02
వి నః సహస్రం శురుధో రదన్త్వ్ ఋతావానో వరుణో మిత్రో అగ్నిః |
యచ్ఛన్తు చన్ద్రా ఉపమం నో అర్కమ్ ఆ నః కామమ్ పూపురన్తు స్తవానాః || 7-062-03
ద్యావాభూమీ అదితే త్రాసీథాం నో యే వాం జజ్ఞుః సుజనిమాన ఋష్వే |
మా హేళే భూమ వరుణస్య వాయోర్ మా మిత్రస్య ప్రియతమస్య నృణామ్ || 7-062-04
ప్ర బాహవా సిసృతం జీవసే న ఆ నో గవ్యూతిమ్ ఉక్షతం ఘృతేన |
ఆ నో జనే శ్రవయతం యువానా శ్రుతమ్ మే మిత్రావరుణా హవేమా || 7-062-05
నూ మిత్రో వరుణో అర్యమా నస్ త్మనే తోకాయ వరివో దధన్తు |
సుగా నో విశ్వా సుపథాని సన్తు యూయమ్ పాత స్వస్తిభిః సదా నః || 7-062-06
