యం త్రాయధ్వ ఇదమ్-ఇదం దేవాసో యం చ నయథ |
తస్మా అగ్నే వరుణ మిత్రార్యమన్ మరుతః శర్మ యచ్ఛత || 7-059-01
యుష్మాకం దేవా అవసాహని ప్రియ ఈజానస్ తరతి ద్విషః |
ప్ర స క్షయం తిరతే వి మహీర్ ఇషో యో వో వరాయ దాశతి || 7-059-02
నహి వశ్ చరమం చన వసిష్ఠః పరిమంసతే |
అస్మాకమ్ అద్య మరుతః సుతే సచా విశ్వే పిబత కామినః || 7-059-03
నహి వ ఊతిః పృతనాసు మర్ధతి యస్మా అరాధ్వం నరః |
అభి వ ఆవర్త్ సుమతిర్ నవీయసీ తూయం యాత పిపీషవః || 7-059-04
ఓ షు ఘృష్విరాధసో యాతనాన్ధాంసి పీతయే |
ఇమా వో హవ్యా మరుతో రరే హి కమ్ మో ష్వ్ అన్యత్ర గన్తన || 7-059-05
ఆ చ నో బర్హిః సదతావితా చ న స్పార్హాణి దాతవే వసు |
అస్రేధన్తో మరుతః సోమ్యే మధౌ స్వాహేహ మాదయాధ్వై || 7-059-06
సస్వశ్ చిద్ ధి తన్వః శుమ్భమానా ఆ హంసాసో నీలపృష్ఠా అపప్తన్ |
విశ్వం శర్ధో అభితో మా ని షేద నరో న రణ్వాః సవనే మదన్తః || 7-059-07
యో నో మరుతో అభి దుర్హృణాయుస్ తిరశ్ చిత్తాని వసవో జిఘాంసతి |
ద్రుహః పాశాన్ ప్రతి స ముచీష్ట తపిష్ఠేన హన్మనా హన్తనా తమ్ || 7-059-08
సాంతపనా ఇదం హవిర్ మరుతస్ తజ్ జుజుష్టన |
యుష్మాకోతీ రిశాదసః || 7-059-09
గృహమేధాస ఆ గత మరుతో మాప భూతన |
యుష్మాకోతీ సుదానవః || 7-059-10
ఇహేహ వః స్వతవసః కవయః సూర్యత్వచః |
యజ్ఞమ్ మరుత ఆ వృణే || 7-059-11
త్ర్యమ్బకం యజామహే సుగన్ధిమ్ పుష్టివర్ధనమ్ |
ఉర్వారుకమ్ ఇవ బన్ధనాన్ మృత్యోర్ ముక్షీయ మామృతాత్ || 7-059-12
