సముద్రజ్యేష్ఠాః సలిలస్య మధ్యాత్ పునానా యన్త్య్ అనివిశమానాః |
ఇన్ద్రో యా వజ్రీ వృషభో రరాద తా ఆపో దేవీర్ ఇహ మామ్ అవన్తు || 7-049-01
యా ఆపో దివ్యా ఉత వా స్రవన్తి ఖనిత్రిమా ఉత వా యాః స్వయంజాః |
సముద్రార్థా యాః శుచయః పావకాస్ తా ఆపో దేవీర్ ఇహ మామ్ అవన్తు || 7-049-02
యాసాం రాజా వరుణో యాతి మధ్యే సత్యానృతే అవపశ్యఞ్ జనానామ్ |
మధుశ్చుతః శుచయో యాః పావకాస్ తా ఆపో దేవీర్ ఇహ మామ్ అవన్తు || 7-049-03
యాసు రాజా వరుణో యాసు సోమో విశ్వే దేవా యాసూర్జమ్ మదన్తి |
వైశ్వానరో యాస్వ్ అగ్నిః ప్రవిష్టస్ తా ఆపో దేవీర్ ఇహ మామ్ అవన్తు || 7-049-04
