ఉద్ ఉ ష్య దేవః సవితా యయామ హిరణ్యయీమ్ అమతిం యామ్ అశిశ్రేత్ |
నూనమ్ భగో హవ్యో మానుషేభిర్ వి యో రత్నా పురూవసుర్ దధాతి || 7-038-01
ఉద్ ఉ తిష్ఠ సవితః శ్రుధ్య్ అస్య హిరణ్యపాణే ప్రభృతావ్ ఋతస్య |
వ్య్ ఉర్వీమ్ పృథ్వీమ్ అమతిం సృజాన ఆ నృభ్యో మర్తభోజనం సువానః || 7-038-02
అపి ష్టుతః సవితా దేవో అస్తు యమ్ ఆ చిద్ విశ్వే వసవో గృణన్తి |
స న స్తోమాన్ నమస్యశ్ చనో ధాద్ విశ్వేభిః పాతు పాయుభిర్ ని సూరీన్ || 7-038-03
అభి యం దేవ్య్ అదితిర్ గృణాతి సవం దేవస్య సవితుర్ జుషాణా |
అభి సమ్రాజో వరుణో గృణన్త్య్ అభి మిత్రాసో అర్యమా సజోషాః || 7-038-04
అభి యే మిథో వనుషః సపన్తే రాతిం దివో రాతిషాచః పృథివ్యాః |
అహిర్ బుధ్న్య ఉత నః శృణోతు వరూత్ర్య్ ఏకధేనుభిర్ ని పాతు || 7-038-05
అను తన్ నో జాస్పతిర్ మంసీష్ట రత్నం దేవస్య సవితుర్ ఇయానః |
భగమ్ ఉగ్రో ऽవసే జోహవీతి భగమ్ అనుగ్రో అధ యాతి రత్నమ్ || 7-038-06
శం నో భవన్తు వాజినో హవేషు దేవతాతా మితద్రవః స్వర్కాః |
జమ్భయన్తో ऽహిం వృకం రక్షాంసి సనేమ్య్ అస్మద్ యుయవన్న్ అమీవాః || 7-038-07
వాజే-వాజే ऽవత వాజినో నో ధనేషు విప్రా అమృతా ఋతజ్ఞాః |
అస్య మధ్వః పిబత మాదయధ్వం తృప్తా యాత పథిభిర్ దేవయానైః || 7-038-08
