ప్ర వ ఇన్ద్రాయ మాదనం హర్యశ్వాయ గాయత |
సఖాయః సోమపావ్నే || 7-031-01
శంసేద్ ఉక్థం సుదానవ ఉత ద్యుక్షం యథా నరః |
చకృమా సత్యరాధసే || 7-031-02
త్వం న ఇన్ద్ర వాజయుస్ త్వం గవ్యుః శతక్రతో |
త్వం హిరణ్యయుర్ వసో || 7-031-03
వయమ్ ఇన్ద్ర త్వాయవో ऽభి ప్ర ణోనుమో వృషన్ |
విద్ధీ త్వ్ అస్య నో వసో || 7-031-04
మా నో నిదే చ వక్తవే ऽర్యో రన్ధీర్ అరావ్ణే |
త్వే అపి క్రతుర్ మమ || 7-031-05
త్వం వర్మాసి సప్రథః పురోయోధశ్ చ వృత్రహన్ |
త్వయా ప్రతి బ్రువే యుజా || 7-031-06
మహాఉతాసి యస్య తే ऽను స్వధావరీ సహః |
మమ్నాతే ఇన్ద్ర రోదసీ || 7-031-07
తం త్వా మరుత్వతీ పరి భువద్ వాణీ సయావరీ |
నక్షమాణా సహ ద్యుభిః || 7-031-08
ఊర్ధ్వాసస్ త్వాన్వ్ ఇన్దవో భువన్ దస్మమ్ ఉప ద్యవి |
సం తే నమన్త కృష్టయః || 7-031-09
ప్ర వో మహే మహివృధే భరధ్వమ్ ప్రచేతసే ప్ర సుమతిం కృణుధ్వమ్ |
విశః పూర్వీః ప్ర చరా చర్షణిప్రాః || 7-031-10
ఉరువ్యచసే మహినే సువృక్తిమ్ ఇన్ద్రాయ బ్రహ్మ జనయన్త విప్రాః |
తస్య వ్రతాని న మినన్తి ధీరాః || 7-031-11
ఇన్ద్రం వాణీర్ అనుత్తమన్యుమ్ ఏవ సత్రా రాజానం దధిరే సహధ్యై |
హర్యశ్వాయ బర్హయా సమ్ ఆపీన్ || 7-031-12
