ఆ నో దేవ శవసా యాహి శుష్మిన్ భవా వృధ ఇన్ద్ర రాయో అస్య |
మహే నృమ్ణాయ నృపతే సువజ్ర మహి క్షత్రాయ పౌంస్యాయ శూర || 7-030-01
హవన్త ఉ త్వా హవ్యం వివాచి తనూషు శూరాః సూర్యస్య సాతౌ |
త్వం విశ్వేషు సేన్యో జనేషు త్వం వృత్రాణి రన్ధయా సుహన్తు || 7-030-02
అహా యద్ ఇన్ద్ర సుదినా వ్యుచ్ఛాన్ దధో యత్ కేతుమ్ ఉపమం సమత్సు |
న్య్ అగ్నిః సీదద్ అసురో న హోతా హువానో అత్ర సుభగాయ దేవాన్ || 7-030-03
వయం తే త ఇన్ద్ర యే చ దేవ స్తవన్త శూర దదతో మఘాని |
యచ్ఛా సూరిభ్య ఉపమం వరూథం స్వాభువో జరణామ్ అశ్నవన్త || 7-030-04
వోచేమేద్ ఇన్ద్రమ్ మఘవానమ్ ఏనమ్ మహో రాయో రాధసో యద్ దదన్ నః |
యో అర్చతో బ్రహ్మకృతిమ్ అవిష్ఠో యూయమ్ పాత స్వస్తిభిః సదా నః || 7-030-05
