ఉపసద్యాయ మీళ్హుష ఆస్యే జుహుతా హవిః |
యో నో నేదిష్ఠమ్ ఆప్యమ్ || 7-015-01
యః పఞ్చ చర్షణీర్ అభి నిషసాద దమే-దమే |
కవిర్ గృహపతిర్ యువా || 7-015-02
స నో వేదో అమాత్యమ్ అగ్నీ రక్షతు విశ్వతః |
ఉతాస్మాన్ పాత్వ్ అంహసః || 7-015-03
నవం ను స్తోమమ్ అగ్నయే దివః శ్యేనాయ జీజనమ్ |
వస్వః కువిద్ వనాతి నః || 7-015-04
స్పార్హా యస్య శ్రియో దృశే రయిర్ వీరవతో యథా |
అగ్రే యజ్ఞస్య శోచతః || 7-015-05
సేమాం వేతు వషట్కృతిమ్ అగ్నిర్ జుషత నో గిరః |
యజిష్ఠో హవ్యవాహనః || 7-015-06
ని త్వా నక్ష్య విశ్పతే ద్యుమన్తం దేవ ధీమహి |
సువీరమ్ అగ్న ఆహుత || 7-015-07
క్షప ఉస్రశ్ చ దీదిహి స్వగ్నయస్ త్వయా వయమ్ |
సువీరస్ త్వమ్ అస్మయుః || 7-015-08
ఉప త్వా సాతయే నరో విప్రాసో యన్తి ధీతిభిః |
ఉపాక్షరా సహస్రిణీ || 7-015-09
అగ్నీ రక్షాంసి సేధతి శుక్రశోచిర్ అమర్త్యః |
శుచిః పావక ఈడ్యః || 7-015-10
స నో రాధాంస్య్ ఆ భరేశానః సహసో యహో |
భగశ్ చ దాతు వార్యమ్ || 7-015-11
త్వమ్ అగ్నే వీరవద్ యశో దేవశ్ చ సవితా భగః |
దితిశ్ చ దాతి వార్యమ్ || 7-015-12
అగ్నే రక్షా ణో అంహసః ప్రతి ష్మ దేవ రీషతః |
తపిష్ఠైర్ అజరో దహ || 7-015-13
అధా మహీ న ఆయస్య్ అనాధృష్టో నృపీతయే |
పూర్ భవా శతభుజిః || 7-015-14
త్వం నః పాహ్య్ అంహసో దోషావస్తర్ అఘాయతః |
దివా నక్తమ్ అదాభ్య || 7-015-15
