శ్రుష్టీ వాం యజ్ఞ ఉద్యతః సజోషా మనుష్వద్ వృక్తబర్హిషో యజధ్యై |
ఆ య ఇన్ద్రావరుణావ్ ఇషే అద్య మహే సుమ్నాయ మహ ఆవవర్తత్ || 6-068-01
తా హి శ్రేష్ఠా దేవతాతా తుజా శూరాణాం శవిష్ఠా తా హి భూతమ్ |
మఘోనామ్ మంహిష్ఠా తువిశుష్మ ఋతేన వృత్రతురా సర్వసేనా || 6-068-02
తా గృణీహి నమస్యేభిః శూషైః సుమ్నేభిర్ ఇన్ద్రావరుణా చకానా |
వజ్రేణాన్యః శవసా హన్తి వృత్రం సిషక్త్య్ అన్యో వృజనేషు విప్రః || 6-068-03
గ్నాశ్ చ యన్ నరశ్ చ వావృధన్త విశ్వే దేవాసో నరాం స్వగూర్తాః |
ప్రైభ్య ఇన్ద్రావరుణా మహిత్వా ద్యౌశ్ చ పృథివి భూతమ్ ఉర్వీ || 6-068-04
స ఇత్ సుదానుః స్వవాఋతావేన్ద్రా యో వాం వరుణ దాశతి త్మన్ |
ఇషా స ద్విషస్ తరేద్ దాస్వాన్ వంసద్ రయిం రయివతశ్ చ జనాన్ || 6-068-05
యం యువం దాశ్వధ్వరాయ దేవా రయిం ధత్థో వసుమన్తమ్ పురుక్షుమ్ |
అస్మే స ఇన్ద్రావరుణావ్ అపి ష్యాత్ ప్ర యో భనక్తి వనుషామ్ అశస్తీః || 6-068-06
ఉత నః సుత్రాత్రో దేవగోపాః సూరిభ్య ఇన్ద్రావరుణా రయిః ష్యాత్ |
యేషాం శుష్మః పృతనాసు సాహ్వాన్ ప్ర సద్యో ద్యుమ్నా తిరతే తతురిః || 6-068-07
నూ న ఇన్ద్రావరుణా గృణానా పృఙ్క్తం రయిం సౌశ్రవసాయ దేవా |
ఇత్థా గృణన్తో మహినస్య శర్ధో ऽపో న నావా దురితా తరేమ || 6-068-08
ప్ర సమ్రాజే బృహతే మన్మ ను ప్రియమ్ అర్చ దేవాయ వరుణాయ సప్రథః |
అయం య ఉర్వీ మహినా మహివ్రతః క్రత్వా విభాత్య్ అజరో న శోచిషా || 6-068-09
ఇన్ద్రావరుణా సుతపావ్ ఇమం సుతం సోమమ్ పిబతమ్ మద్యం ధృతవ్రతా |
యువో రథో అధ్వరం దేవవీతయే ప్రతి స్వసరమ్ ఉప యాతి పీతయే || 6-068-10
ఇన్ద్రావరుణా మధుమత్తమస్య వృష్ణః సోమస్య వృషణా వృషేథామ్ |
ఇదం వామ్ అన్ధః పరిషిక్తమ్ అస్మే ఆసద్యాస్మిన్ బర్హిషి మాదయేథామ్ || 6-068-11
