విశ్వేషాం వః సతాం జ్యేష్ఠతమా గీర్భిర్ మిత్రావరుణా వావృధధ్యై |
సం యా రశ్మేవ యమతుర్ యమిష్ఠా ద్వా జనాఅసమా బాహుభిః స్వైః || 6-067-01
ఇయమ్ మద్ వామ్ ప్ర స్తృణీతే మనీషోప ప్రియా నమసా బర్హిర్ అచ్ఛ |
యన్తం నో మిత్రావరుణావ్ అధృష్టం ఛర్దిర్ యద్ వాం వరూథ్యం సుదానూ || 6-067-02
ఆ యాతమ్ మిత్రావరుణా సుశస్త్య్ ఉప ప్రియా నమసా హూయమానా |
సం యావ్ అప్న స్థో అపసేవ జనాఞ్ ఛ్రుధీయతశ్ చిద్ యతథో మహిత్వా || 6-067-03
అశ్వా న యా వాజినా పూతబన్ధూ ఋతా యద్ గర్భమ్ అదితిర్ భరధ్యై |
ప్ర యా మహి మహాన్తా జాయమానా ఘోరా మర్తాయ రిపవే ని దీధః || 6-067-04
విశ్వే యద్ వామ్ మంహనా మన్దమానాః క్షత్రం దేవాసో అదధుః సజోషాః |
పరి యద్ భూథో రోదసీ చిద్ ఉర్వీ సన్తి స్పశో అదబ్ధాసో అమూరాః || 6-067-05
తా హి క్షత్రం ధారయేథే అను ద్యూన్ దృంహేథే సానుమ్ ఉపమాద్ ఇవ ద్యోః |
దృళ్హో నక్షత్ర ఉత విశ్వదేవో భూమిమ్ ఆతాన్ ద్యాం ధాసినాయోః || 6-067-06
తా విగ్రం ధైథే జఠరమ్ పృణధ్యా ఆ యత్ సద్మ సభృతయః పృణన్తి |
న మృష్యన్తే యువతయో ऽవాతా వి యత్ పయో విశ్వజిన్వా భరన్తే || 6-067-07
తా జిహ్వయా సదమ్ ఏదం సుమేధా ఆ యద్ వాం సత్యో అరతిర్ ఋతే భూత్ |
తద్ వామ్ మహిత్వం ఘృతాన్నావ్ అస్తు యువం దాశుషే వి చయిష్టమ్ అంహః || 6-067-08
ప్ర యద్ వామ్ మిత్రావరుణా స్పూర్ధన్ ప్రియా ధామ యువధితా మినన్తి |
న యే దేవాస ఓహసా న మర్తా అయజ్ఞసాచో అప్యో న పుత్రాః || 6-067-09
వి యద్ వాచం కీస్తాసో భరన్తే శంసన్తి కే చిన్ నివిదో మనానాః |
ఆద్ వామ్ బ్రవామ సత్యాన్య్ ఉక్థా నకిర్ దేవేభిర్ యతథో మహిత్వా || 6-067-10
అవోర్ ఇత్థా వాం ఛర్దిషో అభిష్టౌ యువోర్ మిత్రావరుణావ్ అస్కృధోయు |
అను యద్ గావ స్ఫురాన్ ఋజిప్యం ధృష్ణుం యద్ రణే వృషణం యునజన్ || 6-067-11
