ఇయమ్ అదదాద్ రభసమ్ ఋణచ్యుతం దివోదాసం వధ్ర్యశ్వాయ దాశుషే |
యా శశ్వన్తమ్ ఆచఖాదావసమ్ పణిం తా తే దాత్రాణి తవిషా సరస్వతి || 6-061-01
ఇయం శుష్మేభిర్ బిసఖా ఇవారుజత్ సాను గిరీణాం తవిషేభిర్ ఊర్మిభిః |
పారావతఘ్నీమ్ అవసే సువృక్తిభిః సరస్వతీమ్ ఆ వివాసేమ ధీతిభిః || 6-061-02
సరస్వతి దేవనిదో ని బర్హయ ప్రజాం విశ్వస్య బృసయస్య మాయినః |
ఉత క్షితిభ్యో ऽవనీర్ అవిన్దో విషమ్ ఏభ్యో అస్రవో వాజినీవతి || 6-061-03
ప్ర ణో దేవీ సరస్వతీ వాజేభిర్ వాజినీవతీ |
ధీనామ్ అవిత్ర్య్ అవతు || 6-061-04
యస్ త్వా దేవి సరస్వత్య్ ఉపబ్రూతే ధనే హితే |
ఇన్ద్రం న వృత్రతూర్యే || 6-061-05
త్వం దేవి సరస్వత్య్ అవా వాజేషు వాజిని |
రదా పూషేవ నః సనిమ్ || 6-061-06
ఉత స్యా నః సరస్వతీ ఘోరా హిరణ్యవర్తనిః |
వృత్రఘ్నీ వష్టి సుష్టుతిమ్ || 6-061-07
యస్యా అనన్తో అహ్రుతస్ త్వేషశ్ చరిష్ణుర్ అర్ణవః |
అమశ్ చరతి రోరువత్ || 6-061-08
సా నో విశ్వా అతి ద్విషః స్వసౄర్ అన్యా ఋతావరీ |
అతన్న్ అహేవ సూర్యః || 6-061-09
ఉత నః ప్రియా ప్రియాసు సప్తస్వసా సుజుష్టా |
సరస్వతీ స్తోమ్యా భూత్ || 6-061-10
ఆపప్రుషీ పార్థివాన్య్ ఉరు రజో అన్తరిక్షమ్ |
సరస్వతీ నిదస్ పాతు || 6-061-11
త్రిషధస్థా సప్తధాతుః పఞ్చ జాతా వర్ధయన్తీ |
వాజే-వాజే హవ్యా భూత్ || 6-061-12
ప్ర యా మహిమ్నా మహినాసు చేకితే ద్యుమ్నేభిర్ అన్యా అపసామ్ అపస్తమా |
రథ ఇవ బృహతీ విభ్వనే కృతోపస్తుత్యా చికితుషా సరస్వతీ || 6-061-13
సరస్వత్య్ అభి నో నేషి వస్యో మాప స్ఫరీః పయసా మా న ఆ ధక్ |
జుషస్వ నః సఖ్యా వేశ్యా చ మా త్వత్ క్షేత్రాణ్య్ అరణాని గన్మ || 6-061-14
