శ్నథద్ వృత్రమ్ ఉత సనోతి వాజమ్ ఇన్ద్రా యో అగ్నీ సహురీ సపర్యాత్ |
ఇరజ్యన్తా వసవ్యస్య భూరేః సహస్తమా సహసా వాజయన్తా || 6-060-01
తా యోధిష్టమ్ అభి గా ఇన్ద్ర నూనమ్ అపః స్వర్ ఉషసో అగ్న ఊళ్హాః |
దిశః స్వర్ ఉషస ఇన్ద్ర చిత్రా అపో గా అగ్నే యువసే నియుత్వాన్ || 6-060-02
ఆ వృత్రహణా వృత్రహభిః శుష్మైర్ ఇన్ద్ర యాతం నమోభిర్ అగ్నే అర్వాక్ |
యువం రాధోభిర్ అకవేభిర్ ఇన్ద్రాగ్నే అస్మే భవతమ్ ఉత్తమేభిః || 6-060-03
తా హువే యయోర్ ఇదమ్ పప్నే విశ్వమ్ పురా కృతమ్ |
ఇన్ద్రాగ్నీ న మర్ధతః || 6-060-04
ఉగ్రా విఘనినా మృధ ఇన్ద్రాగ్నీ హవామహే |
తా నో మృళాత ఈదృశే || 6-060-05
హతో వృత్రాణ్య్ ఆర్యా హతో దాసాని సత్పతీ |
హతో విశ్వా అప ద్విషః || 6-060-06
ఇన్ద్రాగ్నీ యువామ్ ఇమే ऽభి స్తోమా అనూషత |
పిబతం శమ్భువా సుతమ్ || 6-060-07
యా వాం సన్తి పురుస్పృహో నియుతో దాశుషే నరా |
ఇన్ద్రాగ్నీ తాభిర్ ఆ గతమ్ || 6-060-08
తాభిర్ ఆ గచ్ఛతం నరోపేదం సవనం సుతమ్ |
ఇన్ద్రాగ్నీ సోమపీతయే || 6-060-09
తమ్ ఈళిష్వ యో అర్చిషా వనా విశ్వా పరిష్వజత్ |
కృష్ణా కృణోతి జిహ్వయా || 6-060-10
య ఇద్ధ ఆవివాసతి సుమ్నమ్ ఇన్ద్రస్య మర్త్యః |
ద్యుమ్నాయ సుతరా అపః || 6-060-11
తా నో వాజవతీర్ ఇష ఆశూన్ పిపృతమ్ అర్వతః |
ఇన్ద్రమ్ అగ్నిం చ వోళ్హవే || 6-060-12
ఉభా వామ్ ఇన్ద్రాగ్నీ ఆహువధ్యా ఉభా రాధసః సహ మాదయధ్యై |
ఉభా దాతారావ్ ఇషాం రయీణామ్ ఉభా వాజస్య సాతయే హువే వామ్ || 6-060-13
ఆ నో గవ్యేభిర్ అశ్వ్యైర్ వసవ్యార్ ఉప గచ్ఛతమ్ |
సఖాయౌ దేవౌ సఖ్యాయ శమ్భువేన్ద్రాగ్నీ తా హవామహే || 6-060-14
ఇన్ద్రాగ్నీ శృణుతం హవం యజమానస్య సున్వతః |
వీతం హవ్యాన్య్ ఆ గతమ్ పిబతం సోమ్యమ్ మధు || 6-060-15
