హువే వః సూనుం సహసో యువానమ్ అద్రోఘవాచమ్ మతిభిర్ యవిష్ఠమ్ |
య ఇన్వతి ద్రవిణాని ప్రచేతా విశ్వవారాణి పురువారో అధ్రుక్ || 6-005-01
త్వే వసూని పుర్వణీక హోతర్ దోషా వస్తోర్ ఏరిరే యజ్ఞియాసః |
క్షామేవ విశ్వా భువనాని యస్మిన్ సం సౌభగాని దధిరే పావకే || 6-005-02
త్వం విక్షు ప్రదివః సీద ఆసు క్రత్వా రథీర్ అభవో వార్యాణామ్ |
అత ఇనోషి విధతే చికిత్వో వ్య్ ఆనుషగ్ జాతవేదో వసూని || 6-005-03
యో నః సనుత్యో అభిదాసద్ అగ్నే యో అన్తరో మిత్రమహో వనుష్యాత్ |
తమ్ అజరేభిర్ వృషభిస్ తవ స్వైస్ తపా తపిష్ఠ తపసా తపస్వాన్ || 6-005-04
యస్ తే యజ్ఞేన సమిధా య ఉక్థైర్ అర్కేభిః సూనో సహసో దదాశత్ |
స మర్త్యేష్వ్ అమృత ప్రచేతా రాయా ద్యుమ్నేన శ్రవసా వి భాతి || 6-005-05
స తత్ కృధీషితస్ తూయమ్ అగ్నే స్పృధో బాధస్వ సహసా సహస్వాన్ |
యచ్ ఛస్యసే ద్యుభిర్ అక్తో వచోభిస్ తజ్ జుషస్వ జరితుర్ ఘోషి మన్మ || 6-005-06
అశ్యామ తం కామమ్ అగ్నే తవోతీ అశ్యామ రయిం రయివః సువీరమ్ |
అశ్యామ వాజమ్ అభి వాజయన్తో ऽశ్యామ ద్యుమ్నమ్ అజరాజరం తే || 6-005-07
